Ирода Тўлаганова бошқарувидаги теннис бўйича Ўзбекистон аёллар терма жамоаси норасмий Жаҳон Чемпионати саналмиш Федерациялар Кубоги саралашида иштирок этмоқда.
Саралашнинг Осиё/Океания минтақаси иккинчи гуруҳида кураш олиб бораётган қизларимиз 19 июль санасида туркманистонлик теннисчиларни 3:0 ҳисобида мағлуб этган эди
Кеча эса спортчиларимиз Янги Зеландия термасига ҳам ҳеч қандай имконият қолдирмаган ҳолда ғалабани қўлга киритишди.
Дастлаб, Нигина Абдураимова Пейж Хурианни 2:1 (7:5, 4:6, 7:6) ҳисобида мағлуб этди.
Ўзбекистоннинг биринчи ракеткаси Сабина Шарипова эса Эрин Рутлиффга ҳеч қандай имконият қолдирмади 2:0 (6:3, 6:1).
Жуфтлик баҳсларида иштирок этган Оқгул Омонмуродова/Камола Умарова дуэти Жоанна Карсуэл/Эрин Рутлифф тандемига қарши баҳс олиб борди. Ушбу ўйин 2:0 (6:3, 6:4) ҳисобида ҳамюртларимиз фойдасига якунига етди.
Шу тариқа Ирода Тўлаганова бошчилигидаги Ўзбекистон аёллар жамоаси Янги Зеландияни ҳам 3:0 ҳисобида мағлуб этиб, кейинги босқичда Индонезия термасига қарши баҳс олиб борадиган бўлди.
