OCHL guruh bosqichining 5-turidagi voqea uchun Xitoyning «Guanchjou Evergrand» klubi OFK tomonidan jazolandi.

Luis Felipe Skolari boshchilik qilayotgan «Guanchjou Evergrand» guruh bosqichida Hongkongning «Istern» klubi bilan to‘qnash keldi. Tomonlarning Guanchjouda kechgan birinchi o‘yinida mezbonlar 7:0 hisobida zafar quchgandi. Bundan ruhlangan xitoylik muxlislar javob o‘yinida hongkongliklarni haqoratlovchi banner ko‘tardi, deb xabar bermoqda Isport. Bannerda «Britaniya itlarini yer tishlating! Hongkong mustaqilligi zahrini bartaraf eting!» degan so‘zlarni ko‘rish mumkin edi.

Ma’lumki, futbol siyosiy ruhdagi har qanday chiqishlarni qoralaydi. Shundan kelib chiqib, OFK muxlislarining bu qilig‘i uchun «Guanchjou Evergrand» klubini jazolashga qaror qildi. Endi Xitoy klubi Chempionlar ligasidagi ikki uchrashuvni muxlislarsiz o‘tkazadi va 22,5 ming AQSH dollari miqdorida jarima to‘laydi.

Ma’lumot uchun, Hongkong 1842 yil britaniyaliklar tomonidan egallab olingan bo‘lib, koloniyaga aylanib qolgandi. 1997 yilga kelib esa Hongkong rasman Xitoyga qaytarilgan.