Kot-d'Ivuar chempionatining eng yaxshi to‘purari Aristid Banse mamlakat futbol federasiyasi tomonidan «Oltin butsa» bilan taqdirlandi.
L`Equipe xabariga ko‘ra, 32 yoshli Burkina-Faso terma jamoasi futbolchisi 26 o‘yinda 13ta gol urib, to‘purarlar bahsida g‘alaba qozongan edi. Biroq u o‘ziga topshirilgan sovrindan ko‘ngli to‘lmadi.
Sovrinni qabul qilib olgan Banse uni alyumindan yasalgani va magazindan sotib olinganini aniqladi.
«Bunday sovg‘adan ko‘ra, og‘zaki tabriklarni ko‘proq qadrlagan bo‘lardim. Uni topshirgan odamlar, narxi 37 yevro deb yozilgan qog‘ozniyam olib tashlamapti. Axir «Oltin butsa» oltindan yasalmaydimi? Bu esa alyumindan yasalgan ekan» - dedi Banse.
