O‘zbekiston futbol federasiyasi hamda Professional futbol ligasi tashabbusi bilan bundan buyon mamlakat chempionati hamda kubogi doirasidagi aksariyat uchrashuvlar internetda translyasiya etib boriladi.
Shu munosabat bilan 23-24 iyul sanalarida poytaxtimizda Oliy Liga ishtirokchi jamoalari vakillari uchun maxsus seminar-ustaxona tashkil etildi. Unda “Lokomotiv” jamoasi matbuot kotibi hamda operatori ham ishtirok etdi.
Seminar so‘nggi paytlarda dunyo bo‘ylab futbol uchrashuvlarini internetda to‘g‘ridan-to‘g‘ri olib ko‘rsatish borasida jahonning yetakchi kompaniyasiga aylangan Shveysariyaning “Empower Sports AG” kompaniyasi vakillari tomonidan olib borildi. Unda ushbu kompaniyaning maxsus internet-platformasi sanalmish – MYCUJOO.TV saytida futbol o‘yinlarini qay tariqa jonli efirga uzatish borasida tushuntirish ishlari olib borildi.
Shu tariqa, bundan buyon bizning ishqibozlarimiz ham jamoamiz ishtirokidagi o‘yinlarni internet orqali jonli kuzatib borish imkoniga ega bo‘lishadi. Buning uchun “Lokomotiv” jamoasining MYCUJOO saytidagi rasmiy sahifasi – www.mycujoo.tv/ch/491 ga kirish kifoya qiladi.
