«Real» klubi «Monako» hujumchisi Kilian Mbappening transferi borasida qat’iy kelishuvga erishdi.

Madridliklar futbolchi uchun 160 million yevro to‘laydigan bo‘lishdi. «Monako» yana 20 million yevroni bonus sifatida olishi mumkin. Boshqa manbaga ko‘ra, «Real» dastlab 150 million yevro berib, keyinchalik 30 million yevroni «Monako»ga bonus sifatida to‘lab berishi mumkin.

Ushbu transfer amalga oshsa, Mbappe futbol tarixidagi eng qimmat futbolchiga aylanadi. Hozirgi rekord esa Pol Pogbaga tegishli bo‘lib, «Yuventus» o‘tgan yili uni «Manchester Yunayted»ga 105 million yevroga sotgandi.

«Real» va «Monako» transfer borasida to‘liq kelishuvga erishganidan keyin, Mbappe madridliklar bilan 6 yillik shartnoma imzolaydi. Uning yillik maoshi soliqlarni chiqarib tashlaganidan keyin 7 million yevroga teng bo‘ladi. Tomonlar ushbu transferni yaqin kunlarda rasmiylashtirish kutilmoqda.