“Bunyodkor” – “Dinamo” uchrashuvidan keyingi matbuot anjumanining ikkinchi qismida “qaldirg‘ochlar” ustozi ishtirok etdi.

- “Dinamo”ni himoyadan o‘ynashini bilardik. Shunga yarasha tayyorgarlik ko‘rgandik. Biroq raqibning metin himoyasini yorib o‘tib, gol urishning imkoni bo‘lmadi. Shukurov va Komilovda gol urish uchun imkoniyatlar bo‘lgandi. Biroq yigitlar vaziyatlarni golga aylantira olishmadi. Raqib bugun tartibli o‘yin ko‘rsatdi. Zaxiradan maydonga tushirgan yangi kuchlar kutilgan o‘yinni namoyish qila olishmadi. Raqib to‘liq kuch bilan himoyaga yotib olgan o‘yinlarda markazdan hujum qilaverish doimo natija bermasligi mumkin. Shu bois qanotlar faolligiga urg‘u bergandik. Biroq zaxiradan qo‘shilganlar ulardan nima istaganimizni tushunib yetishmadi shekili. “Dinamo” avvalgi bosqichda o‘z uyida kerakli natijani qo‘lga kirita olmay, mehmonda “Mash’al” ustidan g‘alaba qozona olgandi. Bu ishni biz ham bajarishimiz mumkin, - deydi Mirjalol Qosimov.