Xitoy so‘nggi ikki yil davomida mamlakatda futbolni yanada rivojlantirish maqsadida bir qator yangiliklarni amalga oshirdi.
Jumladan, mahalliy superliga jamoalari futbolchilar xaridiga Yevropaning manaman degan klublaridan ham ko‘proq mablag‘ sarflashdi.
Biroq xitoylik sarmoyadorlar boshlagan ishning oxiri baxayr bo‘lmasligi mumkin. Chunki olingan so‘nggi ma’lumotlarga ko‘ra, superliganing 13 klubi futbolchilarning maoshi va mukofot pullaridan katta qarzdorlikka kirib qolgan.
Xususan, «Shanxay SIPG» va «Tyanszin Syuanszyan» bu borada yetakchilik qilishmoqda.
Ushbu jamoalar 15 avgustga qadar Xitoy futbol assosiasiyasiga qarzlardan to‘liq qutulishganini isbotlovchi hujjatlarni topshirishlari kerak bo‘ladi. Agar qo‘yilgan talab berilgan muddat mobaynida bajarilmasa, qarzdor klublar kelasi mavsum chempionat o‘yinlaridan chetlatiladilar.
Achinarlisi, ushbu klublar orasida O‘zbekiston milliy termasi sardori Odil Ahmedov to‘p suradigan «Shanxay SIPG» ham bor. Bundan tashqari, superliganing amaldagi chempioni «Guanjou Evergrand Taobao» jamoasi ham futbolchilarning mukofot pullarini o‘z vaqtida to‘lay olmagan.
Asosiysi, qarzi bor klublar ro‘yxatidan O‘zbekiston termasining asosiy himoyachilaridan biri Anzur Ismoilov to‘p suradigan «Chanchun Yatay», shuningdek, dunyoda eng ko‘p maosh ishlab topadigan futbolchi Esekiel Lavessi («Xebey Chayna Forchun»), argentinalik mashhur hujumchi Karlos Teves («Shanxay Shenxua») va belgiyalik taniqli yarim himoyachilardan biri Aksel Vitsel («Tyanjin Kuanjian») o‘ynayotgan jamoalar nomi ham tilga olingan. Milliy termamiz sharafini himoya qiladigan Yegor Krimesning klubi «Pekin Guoan» esa qarzdorlar ro‘yxatiga kiritilmadi.
Ma’lumot o‘rnida, yuqorida nomi qayd etilgan futbolchilar Xitoyda legioner maqomi ostida to‘p surishadi. Xorijlik futbolchilar shu kungacha muntazam ravishda mahalliy futbolchilardan ko‘proq maosh olib kelishgan.
Transfer ma’lumotlari bilan shug‘ullanishga ixtisoslashgan www.transfermarkt.co.uk sayti ma’lumotlariga tayanadigan bo‘lsak, 2017 yil 31 iyul holatiga ko‘ra, Xitoy superligasi uchun 512 futbolchi ro‘yxatdan o‘tkazilib, shulardan 87 nafari (17%) legionerlardir. O‘yinchilarning o‘rtacha yoshi 26,6ni, jami futbolchilarning umumiy narxi esa 337,28 mln. funt sterlingni tashkil etadi. Xitoyliklardan Vu Ley («Shanxay SIPG») 13ta gol bilan to‘purarlik poygasida 2-o‘rinda borayotgan bo‘lsa, Kao Yundiong («Shanxay Shenxua») assistentlar orasida peshqadamlikni saqlab turibdi.
Xitoy superligasining joriy mavsumida (2017) ro‘yxatga kiritilgan legionerlar
|
Klub |
Osiyolik bo‘lmagan legionerlar |
Osiyolik legioner |
Xorijlik boshqa futbolchi* |
Bosh murabbiyi |
|
Pekin Guoan |
Renato Augusto (Braziliya); Ralf (Braziliya); Jonatan Soriano (Ispaniya); Burak Yilmaz (Turkiya) |
Yegor Krimes (O‘zbekiston) |
- |
Rojer Shmidt (Germaniya) |
|
Chanchun Yatay |
Marinyu (Braziliya); Bruno Menegel (Braziliya); Shabolsh Xusti (Vengriya); Odion Igalo (Nigeriya) |
Anzur Ismoilov (O‘zbekiston) |
- |
Chen Jingang |
|
Chongkong Lifan |
Fernandinyu (Braziliya); Xyuri (Braziliya); Alan Kardek (Braziliya); Goran Milovich (Xorvatiya) |
Jung Vu Yung (J.Koreya) |
- |
Chang Voe Ryong (J.Koreya) |
|
Guanjou Evergrand |
Alan Karvalyu (Braziliya); Rikardo Gulart (Braziliya); Murikui (Braziliya); Paulinyo (Braziliya) |
Kim Yong Gvon (J.Koreya) |
Jekson Martines (Kolumbiya); Kim Xyung Il (J.Koreya) |
Luish Felipe Skolari (Braziliya) |
|
Guanjou RF |
Renatinyo (Braziliya); Junior Urso (Braziliya); Solvi Ottesen (Islandiya); Eran Zaxavi (Isroil) |
Apastolos Jiannou (Avstraliya) |
Jang Xyun Su (J.Koreya) |
Dragan Stoykovich (Serbiya) |
|
Guijou Chjichen |
Nikisa Yelavich (Xorvatiya); Taronn Cheri (Gollandiya); Ruben Kastro (Ispaniya); Mario Suares (Ispaniya) |
Rayan Makgovan (Avstraliya) |
Ali G‘azal (Misr); Maykl Olunga (Keniya) |
Gregorio Mansano (Ispaniya) |
|
Xebey Chayna Forchun |
Ezekiel Lavessi (Argentina); Aloizio (Braziliya); Stefan Mbia (Kamerun); Jervinyo (Kot d`Ivuar) |
Kim Ju Yong (J.Koreya) |
Ernanes (Braziliya) |
Manuel Pellegrini (CHili) |
|
Xenan Jianye |
Kristian Bassogog (Kamerun); Borek Dokal (CHexiya); Eddi Gomes (Gvineya-Bisau); Rikardo Vaj Te (Portugaliya) |
Ahmad al Solih (Suriya) |
Xavyer Patino (Filippin) |
Yasen Petrov (Bolgariya) |
|
Jiangsu Suning |
Ramires (Braziliya); Aleks Teysheyra (Braziliya); Benjamin Mukanjo (Kamerun); Rojer Martines (Kolumbiya) |
Trent Seynsberi (Avstraliya) |
Xong Jeong Xo (J.Koreya) |
Fabio Kapello (Italiya) |
|
Lyaoning |
Kristian Bekamenga (Kamerun); Olivye Bumal (Kamerun); Assani Lukimiya (Kongo DR); Antoni Uja (Nigeriya) |
- |
Jeyms Xolland (Avstraliya); Robbi Kruz (Avstraliya); Jeyms Chamanga (Zambiya) |
Ma Lin |
|
Shandong Luneng |
Jil (Braziliya); Diyego Tardeli (Braziliya); Grasiano Pelle (Italiya); Papiss Sisse (Senegal) |
- |
- |
Feliks Magat (Germaniya) |
|
Shanxay Shenxua |
Karlos Teves (Argentina); Fredi Guarin (Kolumbiya); Jovanni Moreno (Kolumbiya); Obafemi Martins (Nigeriya) |
Kim Ki Xi (J.Koreya) |
- |
Gustavo Poyet (Urugvay) |
|
Shanxay SIPG |
Elkeson (Braziliya); Xalk (Braziliya); Oskar (Braziliya); Rikardo Karvalyu (Portugaliya) |
Odil Ahmedov (O‘zbekiston) |
- |
Andre Villash Boash (Portugaliya) |
|
Tyanjin Kuanjian |
Aleks Vitsel (Belgiya); Aleshandro Pato (Braziliya); Antoni Modest (Fransiya) |
Kvon Kyung Von (J.Koreya) |
Jeuvanyu (Braziliya); Junior Morayesh (Braziliya) |
Fabio Kannavaro (Italiya) |
|
Tyanjin Teda |
Frank Acheampong (Gana); Jon Obi Mikel (Nigeriya); Mbaye Dian (Senegal); Nemanya Gudej (Serbiya) |
Xvang Seok Xu (J.Koreya) |
Braun Ideye (Nigeriya) |
Li Lim Sayeng (J.Koreya) |
|
Yanbyan Fude |
Valdet Rama (Albaniya); Bubakarr Travalli (Gambiya); Rixard Guzmich (Vengriya); Nikola Petkovich (Serbiya) |
Xvang Il Su (J.Koreya) |
Kim Seung Dae (J.Koreya); Yun Bit Garam (J.Koreya) |
Park Taye Xa (J.Koreya) |
Izoh: * - chempionatning birinchi davrasida o‘ynagan va jamoani ayni payt tark etgan yoki zaxira futbolchi sifatida ro‘yxatga olingan futbolchilar.
