“Navbahor” – “Qizilqum” jamoalari o‘rtasidagi uchrashuv yakuniga yetgach, har ikki jamoa bosh murabbiylari ishtirokida matbuot anjumani o‘tkazildi. Dastlab navoiyliklar bosh murabbiyi Hamid Aktamov OAV vakillarining savollariga javob qaytardi:

- Birinchi navbatda “Navbahor” jamoasini bugungi g‘alaba bilan tabriklayman. Bugun kurashlarga boy o‘yin bo‘ldi. Har ikki jamoa ham g‘alaba uchun harakat qildi. Omadimiz biroz yetishmadi. “Navbahor” o‘z maydonida to‘p surdi. Qolaversa jamoani ko‘p mingli sonli muxlislarning qo‘llab-quvvatlab turishdi. Bu yilgi mavsumda bu kabi muxlislarni ko‘rmagandim. Bundan xursand bo‘ldim. Jamoani munosib tarzda qo‘llab, futbolchilarning ruhini ko‘tarishgani uchun ishqibozlarga rahmat aytmoqchiman. Futbol muxlislar uchun o‘ynaladi. O‘yingohda ishqibozlar ko‘p bo‘lsa futbolimiz ham rivojlanadi. Bugun muxlislarni qo‘llashi tufayli “Navbahor” futbolchilarini ruhi ko‘tarilib, o‘yini ochilib ketdi.

O‘z jamoamiz haqida gap ketganida, bugun yoshlarga imkoniyat bergandim. Uchrashuv boshidan yoshlarni maydonga tushirgandim. Guvohi bo‘lganingizdek, ikki xil taym bo‘ldi. Birinchi bo‘limda umuman o‘yinimiz chiqmadi. Yoshlarga ham imkoniyat berib ularni ham tayyorlashimiz kerak. Tanaffusdan keyin futbolchilarimiz harakat qilishgan bo‘lsada, xavfli vaziyatlarni kerakli darajada yuzaga keltira olmadik. Qolaversa, maydonning ahvoli ham yaxshi emasdi. Bu bilan bahona qilmoqchi emasman, biroq bunday maydonda hali to‘p surmagandik.