IKA va Osiyo–Okeaniya Kurash Konfederasiyasi taqvim rejasiga asosan joriy yilning 9-13 avgust kunlari Eron Islom Respublikasining Bojnurd shahrida yoshlar o‘rtasida Osiyo chempionati bahslari bo‘lib o‘tdi.
 
Osiyo qit’asining 20 ga yaqin davlatlaridan kelgan yosh kurashchilar anjumanida O‘zbekiston sharafini Olim Ravshanov murabbiyligi ostidagi 5 nafar iqtidorli polvonlar himoya qilishdi. Bu haqda O‘zbekiston Kurash Federasiyasi Matbuot xizmati xabar berdi.
 
Qizg‘in kechgan bahslardan so‘ng o‘zbekistonlik sportchilardan Erkin Qozoqov 66 kg, Maddiyor Erkinov 73 kg, Suxrob Egamberdiyev +100 kg vazn toifalarida qit’ada tengsiz deb topildi. 81 kg vaznda gilamga chiqqan Bunyod Tursunov finalda mezbonlar vakiliga imkoniyatni boy berib kumush medalga munosib ko‘rildi.
 
O‘zbekiston terma jamoasi umumjamoa medallar hisobi bo‘yicha Eron (3 ta oltin, 2 ta kumush va 3 ta bronza) davlatidan so‘ng ikkinchi o‘rinni egalladi.
 
O‘zbekistonlik kurashchilar bugun, 14 avgust kuni soat 01-00 da Toshkent aeroportida kutib olindi.