Diqqat markazida yana o‘sha Bibiana Shtaynxaus. U bu safar kimsan Frank Riberini hijolat tortishga majbur qildi.
Ha, Germaniya kubogi doirasidagi o‘yin davomida mashhurlikka erishib ulgurgan ayol hakam bilan yana bir ko‘zda tutilmagan qaltisroq voqea yuz berdi.
Fransuz futbolchisi uning butsasi bog‘ichini yechishga urindi, go‘yo. Bibiana bunga javoban Frankni asta turtib qo‘ydi. «Sovetskiy sport» nashri esa shu «komediya» tafsilotlarini kengroq bayon etishni lozim ko‘rdi.
Oliy darajadagi o‘yinlarda hakamlik qilayotgan Bibiana Shtaynxaus yevrofutbol muxlislariga yaxshi tanilib ulgurgan ayoldir. Ha, gap o‘sha eng qattiqqo‘l mallasoch xonim haqida ketyapti. U Germaniya futbolida o‘yinlarni o‘zining jiddiy nigohi bilan binoyidek boshqaryapti. Bibiana qattiqqo‘llikni o‘rniga qo‘yish barobarida vaziyatga qarab, futbolchilardan shirin tabassumini ham ayamaydi. Ammo ba’zan noqulay ahvolga ham tushmoqda. Axir u maydonda 22 nafar erkak harakatini nazorat qilib boradi. Misol uchun, o‘yinlar chog‘i qaysidir futbolchi unga tasodifan urilib ketishi mumkin, kimdir esa mallasochga atayin teginishni xohlab qoladi. Deylik, bunday holatlar 3-4 marta kuzatildi.
Avvalgi hafta ro‘y bergan voqeaga kelsak, «Bavariya»ning fransiyalik yarim himoyachisi Frank Riberi Germaniya kubogi birinchi bosqichi doirasida «Kemniser»ga qarshi kechgan safar o‘yini (5:0) payti bosh hakam sifatida ishlagan Bibiana Shtaynxaus bilan noodatiy tarzda hazillashmoqchi bo‘ldi. Demak, voqeani bir boshdan bayon etamiz. O‘yinning 79-daqiqasida myunxenliklar jarima zarbasi tepish huquqini qo‘lga kiritishdi. Fransiyalik futbolchi to‘pni nuqtaga o‘rnatib, zarba yo‘llashga chog‘landiyu, birdan negadir Bibiana butsasi bog‘ichini yechishga urindi. Qaltis hazil. Referi bu vaziyatda haqiqiy ayollardek ish tutdi: futbolchining harakatini darrov payqab, uni shunchaki, ohista turtib qo‘ydi. Aslida u hakamlik qoidalariga asosan, Frankni kartochka bilan «siylashi» mumkin edi. Harqalay, qoidalarga ko‘ra, hakamga har qanday ixtiyoriy teginish sariq kartochka bilan jazolanadi. Eng e’tiborlisi, Bibiananing «qo‘l ko‘tarishi» fransiyalik futbolchiga ijobiy ta’sir qildimi, u bir necha soniyalardan so‘ng jarima zarbasini qoyilmaqom darajada bajarib, hisobni 4:0 ko‘rinishiga keltirdi.
Aytgancha...
Bibiana Shtaynxaus yangi mavsumda Germaniya bundesligasi doirasidagi o‘yinlarini ham boshqarib boradi. U bunday sharafga loyiq ko‘rilgan birinchi ayol hakamdir.
