Shu yilning 31 avgust kuni O‘zbekiston milliy terma jamoasi JCH–2018 saralashi doirasida Xitoyga qarshi safarda maydonga tushadi.

Mazkur uchrashuv to‘g‘ridan-to‘g‘ri Jahon chempionati yo‘llanmasini qo‘lga kiritish yo‘lida o‘zining dolzarbligi bilan ahamiyatli hisoblanadi.

Ma’lumki, 31 avgust kuni soat 16:00 larda O‘zbekiston Mustaqilligining 26 yillik bayramiga bag‘ishlangan tadbirlar boshlanishi kutilmoqda. Xitoy–O‘zbekiston o‘yini esa Toshkent vaqti bilan soat 17:00 ga belgilangan.

Xulosa shuki, Xitoy–O‘zbekiston uchrashuvi “Sport” telekanali orqali bayram tantanalari tugashi bilan, taxminan 18:30 larda yozib olingan shaklida efirga uzatilishi mumkin. Efir vaqtiga o‘zgartirishlar kiritilishi ham ehtimoldan holi emas.

Eslatib o‘tamiz, O‘zbekiston terma jamoasi 31 avgust kuni safarda Xitoyga qarshi maydonga tushgandan keyin 5 sentyabr kuni Toshkentda Janubiy Koreya terma jamoasini qabul qiladi.

Ma’lumot o‘rnida, O‘zbekiston terma jamoasi JCH–2018 saralash bosqichi 8-turidan keyin 12 ochko to‘plab, to‘g‘ridan-to‘g‘ri qo‘lga kiritilishi mumkin bo‘lgan yagona yo‘llanma uchun kurashda 2-o‘rindagi Janubiy Koreyadan 1 ochkoga ortda qolmoqda.