O‘zbekiston milliy terma jamoasi 31 avgust kuni JCH—2018 saralashi doirasida safarda Xitoy terma jamoasiga qarshi maydonga tushdi. O‘yin 1:0 hisobida xitoyliklar g‘alabasi bilan yakunlandi — g‘alaba to‘pi penaltidan kiritildi.

Ikki yillik tanaffusdan so‘ng ilk bor O‘zbekiston milliy terma jamoasi darvozasini qo‘riqlagan Ignatiy Nesterov penaltidan yo‘llangan zarba yo‘nalishini topdi, biroq uning yo‘liga to‘la g‘ov bo‘la olmadi.

Baxtga qarshi, Nesterov penaltilar qaytarish bo‘yicha hech qachon mutaxassis bo‘lmagan, biroq og‘ir o‘yinlarda qahramonlik ko‘rsatish — uning yo‘nalishi. Agar o‘yin O‘zbekiston g‘alabasi bilan tugaganida, Nesterov o‘yinning birinchi raqamli qahramoni bo‘lardi, shubhasiz.

Adolat bo‘lsin uchun qayd etish joiz, Nesterov ham o‘yinni butun jamoadoshlari kabi hayajon bilan boshladi, shu sababli ham o‘yin boshidayoq aynan o‘zining aybi bilan o‘z darvozasidan to‘p olib chiqishi mumkin edi.

Biroq bundan keyingi deyarli barcha vaziyatlarda Ignatiy Nesterov haqiqiy ma’noda qahramonlik ko‘rsatdi — jamoadoshlarining penaltigacha bo‘lgan barcha xatolarini mardonavor bartaraf etdi.

O‘yin boshida butun jamoa qatori Ignatiy Nesterovni ham ayovsiz tanqid qilgan ijtimoiy tarmoq foydalanuvchilari o‘yin intihosiga kelib uni darvozaga qo‘yish — Babayanning milliy termadagi faoliyati davomida yagona to‘g‘ri qarori, deb ham ta’rifladi.