Ўзбекистон миллий терма жамоаси 31 август куни ЖЧ—2018 саралаши доирасида сафарда Хитой терма жамоасига қарши майдонга тушди. Ўйин 1:0 ҳисобида хитойликлар ғалабаси билан якунланди — ғалаба тўпи пенальтидан киритилди.
Икки йиллик танаффусдан сўнг илк бор Ўзбекистон миллий терма жамоаси дарвозасини қўриқлаган Игнатий Нестеров пенальтидан йўлланган зарба йўналишини топди, бироқ унинг йўлига тўла ғов бўла олмади.
Бахтга қарши, Нестеров пенальтилар қайтариш бўйича ҳеч қачон мутахассис бўлмаган, бироқ оғир ўйинларда қаҳрамонлик кўрсатиш — унинг йўналиши. Агар ўйин Ўзбекистон ғалабаси билан тугаганида, Нестеров ўйиннинг биринчи рақамли қаҳрамони бўларди, шубҳасиз.
Адолат бўлсин учун қайд этиш жоиз, Нестеров ҳам ўйинни бутун жамоадошлари каби ҳаяжон билан бошлади, шу сабабли ҳам ўйин бошидаёқ айнан ўзининг айби билан ўз дарвозасидан тўп олиб чиқиши мумкин эди.
Бироқ бундан кейинги деярли барча вазиятларда Игнатий Нестеров ҳақиқий маънода қаҳрамонлик кўрсатди — жамоадошларининг пенальтигача бўлган барча хатоларини мардонавор бартараф этди.
Ўйин бошида бутун жамоа қатори Игнатий Нестеровни ҳам аёвсиз танқид қилган ижтимоий тармоқ фойдаланувчилари ўйин интиҳосига келиб уни дарвозага қўйиш — Бабаяннинг миллий термадаги фаолияти давомида ягона тўғри қарори, деб ҳам таърифлади.
