JCH—2018 saralashi doirasida Xitoy mehmoni bo‘lgan O‘zbekiston milliy terma jamoasi o‘yinda gol urish uchun haqiqatan-da ko‘plab imkoniyatlarga ega bo‘ldi.

Mavzuga doir: «Babayanning faoliyatidagi yagona to‘g‘ri qarori». Ignatiy Nesterov — mag‘lubiyat bilan tugagan o‘yindagi qahramon

Ana shunday imkoniyatlarning eng qulayi — birinchi taymda deyarli ko‘zga tashlanmagan, lekin Babayan tomonidan milliy terma jamoaning barcha uchrashuvlarida asosiy tarkibga qo‘yiladigan Igor Sergeevda bo‘ldi.

Xitoy chempionatidagi yarim yillik faoliyati davomida Xitoy klublari darvozasiga atigi bir marta gol ura bilgan «Paxtakor» hujumchisining Xitoy milliy terma jamoasi darvozasi oldida qanday vaziyatni yo‘qqa chiqarganini faqat tomosha qilish kerak — uchrashuvni «Sport» telekanali orqali sharhlab borgan taniqli sharhlovchi Xayrulla Hamidov ta’biri bilan aytganda, «bunday vaziyatda gol ura olmaslik uchun ham mashg‘ulot o‘tkazish kerak»:

Igor Sergeev futbol muxlislari tomonidan tinimsiz tanqid qilinadigan hujumchilardan biridir. U na o‘z klubi safida, na milliy terma jamoada o‘zining golurarligi bilan ajralib turadi, shunga qaramay, milliy terma jamoa bosh murabbiyi Samvel Babayan tomonidan muntazam ravishda asosiy tarkibga qo‘yiladi.

Xitoyga qarshi o‘yinda terma jamoa hujumlari o‘tkirlashgani bilan, o‘tkir hujumchining yo‘qligi sezilib qolgan pallada ham, Babayan sevimli hujumchisini almashtirish haqida o‘ylamadi — toki Sergeevning o‘zi jarohat olmagunicha.