“Katta dubulg‘a” turkumiga kiruvchi musobaqalarda 23 bor zafar quchgan Serene Uilyams 35 yoshida qiz chaqaloqni dunyoga keltirdi. Uning onalik baxtiga erishishi o‘z yurtida o‘tayotgan AQSH ochiq chempionati avjiga chiqqan paytiga to‘g‘ri keldi. Avvalo “oltin to‘p” malikasi Serena chaqalog‘ini qo‘liga olarkan, “ Shu darajada hayajondamanki, hissiyotlarimni ta’riflashga so‘z topolmayman”, dedi. O‘zi singari tennischi opasi Vinus ham jiyanli bo‘lganidan boshi osmonda. Shu bois o‘sha kuni o‘zgacha shijot bilan kortga tushgan Vinus yunonistonlik raqibasi Mariya Sakkarini 6:3, 6:4 hisobida taslim etdi.
Serenaga shuningdek, murabbiysi, bir qator mashhur shaxslar, jumladan, raketka ustasi Rafael Nadal, qo‘shiqchi Beyonse ham ijtimoiy tarmoq va telefon orqali tabrik yo‘llashdi. Ular orasida ispaniyalik tennischi Gabrinya Mugurusaning tabrigi Serenaga ham yoqib tushdi. Unda shunday deyilgan: “Chaqalog‘ing qizmi, ajabo!? U sen kabi tennischi bo‘lmasligiga umid qilaman. Aks holda...”