Boks bo‘yicha O‘zbekiston terma jamoasi a’zolari Germaniyaning Hamburg shahrida o‘tkazilgan jahon chempionatida 1 ta oltin, 3 ta kumush va 2 ta bronza medalni qo‘lga kiritib, umumjamoa hisobida ikkinchi o‘rinni egallaganlaridan xabaringiz bor.

Kecha, 4 sentyabr kuni terma jamoa a’zolari yorug‘ yuz bilan O‘zbekistonga qaytib keldilar. Islom Karimov nomidagi Toshkent xalqaro aeroportida terma jamoa a’zolari va murabbiylarnm vazirlik va idoralar vakillari, ommaviy axborot vositalari xodimlari, sport muxlislari tantanali ravishda kutib oldi.

Germaniyada o‘tgan nufuzli musobaqada 85 davlatdan 280 bokschi sovrinli o‘rinlar uchun bellashdi. Unda o‘zbekistonlik sportchilar mamlakat boks maktabi salohiyatini yana bir karra namoyish etdi. Ayniqsa, Shahram G‘iyosovning g‘alabasi butun dunyo e’tiborini O‘zbekistonga qaratdi.

“Xalqaro maydondagi nufuzli musobaqalarda qatnashayotgan har bir sportchimiz ortida o‘zini mana shu darajaga yetkazgan Vatanimiz, xalqimiz turganini, yaratilayotgan sharoitlarning barchasi istiqlolimiz sharofatidan ekanini chin dildan his qiladi. Mana shu tuyg‘u biz, sportchilarga katta kuch-quvvat va ishonch beradi. Jahon chempionatidagi g‘alabamizni eng ulug‘, eng aziz bayramimiz – Vatanimiz mustaqilligining 26 yilligiga bag‘ishlaymiz”, deydi Shahram G‘iyosov.

Ma’lumot uchun, Hasanboy Do‘smatov, Iqboljon Xoldorov, Jasurbek Latipov kumush, Sanjar Tursunov va Bektemir Meliqo‘ziyev bronza medalni qo‘lga kiritdi.