“Dinamo” – “Qo‘qon-1912” uchrashuvidan keyingi matbuot anjumanining birinchi qismida jamoamiz ustozi No‘’mon Hasanov ishtirok etdi.

- Bugungi o‘yinni ko‘rdingiz. Har ikki jamoa shiddatli o‘yin ko‘rsatishga intildi. Biz har doim g‘alaba uchun maydonga tushamiz. Shuning uchun bugun ikki ochko yo‘qotdik deyishim mumkin. Bugun har ikki jamoa ham borini berib o‘ynadi.

Uchrashuv durangga mos ravishda kechdi. Har ikki jamoada bittadan golga tortadigan vaziyatlar sodir bo‘ldi, xolos. Maqsadimiz to‘p o‘tkazib yubormasdan bitta gol urish edi. Ammo biroz o‘xshamay qoldi. O‘zi negadir futbolchilarimiz o‘z maydonimizda boshqacha, mehmonda boshqacha o‘yin ko‘rsatishmoqda. Mana, “Dinamo” ham o‘z uyida yaxshi to‘p suryapti.

Moliyaviy tomondan kamchiliklarimiz yo‘q. Klub rahbariyatiga bu borada o‘z minnatdorchiligimni izhor etaman.

Mavsum boshida jamoa oldiga yaxshi o‘yin ko‘rsatib muxlislarimizni xursand qilish maqsadi qo‘yilgan edi. Hamon o‘sha maqsadimiz o‘zgarishsiz qoldi.

Ikkinchi davra arafasida jamoamizga to‘rt nafar yangi futbolchilarni olgandik. Ularning barchasi mening ishonchlarimni oqlashmoqda. Yangi o‘yinchilarimiz bizning oilamizga kirishib ketishdi. “Qo‘qon-1912” jamoasini bir oila deb atash mumkin.

Vaqt o‘tgani sari o‘yinimiz yanada kuchayib borishiga shubham yo‘q. “Dinamo”ga keyingi o‘yinlarda omad tilayman.