Oliy liga 20-turida "Navbahor" Muborakda “Mash’al” mehmoni bo‘ldi.
Uchrashuvning debyutida jamoalar bir-birlarini o‘yin uslubini o‘rganishga e’tibor qaratishdi. Vaqt o‘tgani sayin futbolchilar hujumlar tashkil etishga o‘tishdi. Lekin, Muborakda havo harorati issiq bo‘lganligi sababli tezkor hujumlar tashkil etishda qiyinchiliklarga duch kelishdi.
27-daqiqada mezbonlar penalti tepish imkoniga ega bo‘lishdi. A’zam Aliyevni o‘z jarima maydonchasi ichida to‘pni qo‘li bilan o‘ynadi deb topgan Qodirov nuqtani ko‘rsatdi. Penaltini Shahzod Shaymanov aniq amalga oshirib, hisobni ochdi.
Tez orada hisob tenglashdi. Azizbek Turg‘unboyev ikki bor burchak to‘pini amalga oshirgach, ikkinchi urinishda Nemanya Yovanovich boshi bilan to‘pni darvozaga joylab qo‘ydi. Serbiyalik hujumchi “Navbahor”ning O‘zbekiston chempionatlaridagi 1300-golini urganligini ham qo‘shimcha qilish joiz.
Ikkinchi bo‘lim teng kurashlar ostida o‘tgan bo‘lsa-da, maydon egalari g‘alaba to‘pini kiritishni uddasidan chiqishdi. 59-daqiqada “Mash’al”ning markazdan tashkil etgan hujumi gol bilan yakunlandi. Xumoyun Murtazoyev Zafar To‘rayevni qulay vaziyatga chiqardi. Amanov bilan yolg‘iz qolgan muborakliklar hujumchisi imkoniyatdan samarali foydalandi.
Mag‘lubiyatga uchrashni istamagan mehmonlar maydonga Ro‘zimboy Ahmedovni, keyinchalik esa Abbos Maxstaliyevni tushirishdi. Oldingi chiziqlar kuchaytirilgan bo‘lsada, hujumlarni gol bilan yakunlash nasib etmadi. O‘z navbatida mezbonlar ham hisobda oldinga chiqib olgach, himoyada bexato harakat qilib, qarshi hujumlarga e’tibor qaratishdi. Zaxiradan safga qo‘shilgan Ro‘zimboy Ahmedov “Mash’al” posbonining qo‘pol xatosidan samarali foydalanganida, Muborakda durang qayd etilishi ham mumkin bo‘lardi.
Oliy liga, 20-tur
7 sentyabr. Muborak. B.Vafoyev nomli o‘yingoh.
“Mash’al” - “Navbahor” - 2:1 (1:1)
Gollar: SH. Shaymanov (23-pen.), Z.To‘rayev (59) - N.Yovanovich (27).
Hakamlar: Z.Qodirov, O.Jumayev, R.Samandarov, SH.Rajabov.
Nazoratchi – X.Muxtorov.
PFL vakili – V.Lyotkin.
“Mash’al”: 35. Javohir Ilyosov, 6. Sardor Abduraimov, 10. Xumoyun Murtazoyev, 13. Shahzod Shaymanov, 18. Abbos Shodmonov, 19. Zohir Qo‘ziboyev (77. Abdulloh Olimov, 46), 27. Nikita Pavlenko (2. Iskandar Shayqulov, 80), 31. Igor Timanyuk, 44. Asiljon Begimqulov, 55. Avaz Agaliyev, 90. Zafar To‘rayev (23. Kenja To‘rayev, 88).
“Navbahor”: 30. Asilbek Amanov, 5. G‘iyos Komilov, 7. Oybek Qilichev (22. Ro‘zimboy Ahmedov, 60), 9. Dilshod Jabborov (S), 18. Doniyor Usmonov (24. Sardor Azimov, 50), 19. Mirzohid G‘ofurov, 21. A’zam Aliyev, 32. Jahongir Mehmonov, 44. Darko Stanoyevich (70. Abbos Maxstaliyev, 76), 77. Azizbek Turg‘unboyev, 84. Nemanya Yovanovich.
Ogohlantirishlar: A.SHodmonov (68) - M.G‘ofurov (77).
