Bugun Oliy Ligada 20-tur uchrashuvlari davom ettiriladi.

Kun doirasidan 3 ta bellashuv o‘rin olgan bo‘lib, ulardan eng qiziqarli hamda murosasiz ruhda o‘tishi kutilayotgan matchlardan biri poytaxtimizdagi “Lokomotiv” stadionida bo‘lib o‘tadi. Unda Oliy Liga musobaqa jadvali karvonboshisi “Lokomotiv” G‘uzorning “Sho‘rtan” jamoasini qabul qiladi.

Qayd etish joizki, bugungi bellashuv “temiryo‘lchilar” jamoasi uchun prinsipial ahamiyatga ega. Zero O‘zbekistonning amaldagi chempioni joriy mavsumni juda ko‘tarinki ruhda o‘tkazmoqda. Lekin jamoa milliy chempionatimizda 2 ta bellashuvni kutilmaganda boy berib qo‘ydi. Ulardan biri aynan G‘uzorda “Sho‘rtan” bilan bo‘lgan matchda qayd etilgandi.

Birinchi davra doirasida kechgan bellashuvda “oq bo‘rilar” kutilmaganda “Loko” futbolchilarini 2 ta to‘p farqi bilan mag‘lub etishgandi. Bugun esa “Lokomotiv” futbolchilari o‘sha kungi mag‘lubiyat tasodif ekanini isbotlash uchun urinib ko‘rishadi.

Ta’kidlash kerakki, “Lokomotiv” hamda “Sho‘rtan” jamoalari shu paytga qadar ichki chempionatimiz doirasida 21 marta o‘zaro bahs olib borishgan. Qiziqarli tarzda o‘tgan bellashuvlar tarixidagi ustunlik “temiryo‘lchilar” jamoasi tarafida.

“Lokomotiv” o‘zaro o‘yinlarning 10tasini o‘z foydasiga hal etgan. Mehmonlar esa 8 ta uchrashuvda g‘olib chiqishgan. Yana 3 ta bellashuvda g‘olib nomi aniqlanmagan, durang natija qayd etilgan.

Vakillarimiz g‘uzorliklar darvozasini umumiy hisobda 39 marta ishg‘ol etib, 20 bor to‘p o‘tkazib yuborishgan. “Loko” ushbu raqib ustidan yirik hisoblarda ko‘p bor g‘alaba qozongan. Ayniqsa, jamoamiz ikki marta 4:0 hisobida g‘alabaga erishgan. “Sho‘rtan”ning “Loko” ustidan qozongan eng yirik hisobdagi g‘alabasi – 2:0 sanaladi.