Shu yilning 7 sentyabr kuni Radisson BLU Hotel Tashkent mehmonxonasida “O‘zbekistonda sport tashkilotlarini boshqarish va dunyo tajribasi” konferensiyasi bo‘lib o‘tdi.

Konferensiyada 2017 yilning 10 avgustida qabul qilingan O‘zbekiston Respublikasi Prezidentining 3196 raqamli “Nufuzli xalqaro sport musobaqalarida yuksak natijalarga erishgan O‘zbekiston sportchilarini jamoat va sport ishlariga keng jalb etish hamda sportchilarni va ularning trenerlarini rag‘batlantirish to‘g‘risida”gi qarori muhokama qilindi.

Shuningdek, ushbu konferensiyada mamlakatimizda sport, xususan, futbolni rivojlantirish uchun qanday ishlar amalga oshirilishi lozim ekani, O‘zbekiston Futbol Federasiyasi ish tizimini o‘zgartirish hamda isloh etish borasida qanday ishlar amalga oshirilishi lozim ekani gapirib o‘tildi.

Ta’kidlash joizki, konferensiya yakunida unda qatnashgan bir qator futbol faxriylari O‘zbekiston Respublikasi Prezidenti Shavkat Mirziyoyev, Davlat maslahatchisi Axmadxo‘ja Yunusxodjayev, O‘zbekiston Respublikasi jismoniy tarbiya va sport qo‘mitasi raisi Rustam Qurbonov, O‘zbekiston Milliy olimpiya qo‘mitasi Prezidenti Alisher Sultonov nomiga rezolyusiya yuborishdi. Rezolyusiyada konferensiya ishtirokchilarining mamlakatimizda futbolni isloh etish borasidagi takliflari bayon etilgan.

Qayd etish joizki, Anhor.uz saytida rezolyusiya imzolagan faxriylar nomi ma’lum qilindi. Unda rezolyusiyaga imzo chekish paytida konferensiyada ishtirok etganlik to‘g‘risidagi qog‘ozga qo‘l qo‘yyapman, deb o‘ylagan “Lokomotiv” jamoasi murabbiylari – Andrey Miklyayev, Andrey Fyodorov hamda “Lokomotiv” futbol klubi o‘yinchisi – Timur Kapadzening nomlari ham zikr etilgan.

Keng ommaga ma’lum qilmoqchimizki, jamoamiz nomidan ushbu konferensiyaga taklif etilgan 2 nafar murabbiy hamda bir nafar futbolchi tashkilotchilarning taklifini rad etmaslik uchun ham unda ishtirok etishdi. Biroq ular konferensiya yakunida rezolyusiya imzolanishidan butunlay bexabar bo‘lishgan hamda unga qo‘l qo‘yish niyatida bo‘lishmagan.