"Shanxay SIPG" yarimhimoyachisi Odil Ahmedov "Guanchjou Evergrand"ga qarshi OCHL chorakfinal o‘yinidan so‘ng, o‘z fikrlari bilan o‘rtoqlashdi.

Ma’lumki, shanxayliklar dastlabki o‘yinda 4:0 hisobida g‘alaba qozonib, javob o‘yinida 1:5 hisobida mag‘lub bo‘lgan, ammo penaltilar seriyasida zafar quchgan edi.

Hamyurtimizning fikriga ko‘ra, mezbonlar bu o‘yinda g‘alaba qozonish uchun hamma narsani ishga solgan.

"Guanchjou" o‘yindan oldin, rosa "o‘yin" qildi. Bizni shahar chekkasidagi haroba mehmonxonaga joylashtirishdi. Kechasi bilan uxlatishmadi. Turli bahonalar qilib, mahalliy polisiya tekshirishga kelaverdi.

Stadionga qarab yo‘lga chiqqanimizda, turli avtohalokatlarni uyushtirib, yo‘llarni yopib qo‘yishdi. Natijada, o‘yin boshlanishiga sanoqli daqiqalar qolganida stadionga yetib keldik.
Ammo, adolat qaror topganidan xursandman. Biz yarimfinalga yo‘l oldik" - dedi Ahmedov.