"Шанхай СИПГ" яримҳимоячиси Одил Аҳмедов "Гуанчжоу Эвергранд"га қарши ОЧЛ чоракфинал ўйинидан сўнг, ўз фикрлари билан ўртоқлашди.

Маълумки, шанхайликлар дастлабки ўйинда 4:0 ҳисобида ғалаба қозониб, жавоб ўйинида 1:5 ҳисобида мағлуб бўлган, аммо пенальтилар сериясида зафар қучган эди.

Ҳамюртимизнинг фикрига кўра, мезбонлар бу ўйинда ғалаба қозониш учун ҳамма нарсани ишга солган.

"Гуанчжоу" ўйиндан олдин, роса "ўйин" қилди. Бизни шаҳар чеккасидаги ҳароба меҳмонхонага жойлаштиришди. Кечаси билан ухлатишмади. Турли баҳоналар қилиб, маҳаллий полиция текширишга келаверди.

Стадионга қараб йўлга чиққанимизда, турли автоҳалокатларни уюштириб, йўлларни ёпиб қўйишди. Натижада, ўйин бошланишига саноқли дақиқалар қолганида стадионга етиб келдик.
Аммо, адолат қарор топганидан хурсандман. Биз яримфиналга йўл олдик" - деди Аҳмедов.