«Shanxay Shenxua» klubining yangi bosh murabbiyi U Szinsu yulduz futbolchilardan hayiqmasligini namoyish qildi.

Sky Sports xabariga ko‘ra, mutaxassis jamoa yetakchilari bo‘lmish Karlos Teves va Freddi Guarinni ortiqcha vazni tufayli asosiy tarkibdan chetlatdi.

«Teves bugungi kunda jismonan tayyor emas. Guarin bilan ikkalasida ortiqcha vazn bor. Men natija uchun javobgarman, futbolchilar uchun emas. Agar jamoaning yutug‘ini ta’minlash uchun qo‘lingizdan hech narsa kelmasa, tarkibga kiritilmaysiz.

Men juda ko‘p yulduzlar bilan ishlaganman va men uchun futbolchining obro‘si hech qanday ahamiyatga ega emas», — dedi Szinsu.

Eslatib o‘tamiz, Karlos Teves dunyoning eng ko‘p maosh oluvchi futbolchilaridan biri hisoblanadi. Taxminlarga ko‘ra, uning mehnat haqi yiliga 30 mln yevroga yaqin.

Joriy mavsumda u 12ta o‘yinda maydonga tushib, bor yo‘g‘i ikkita gol urgan.