Bugun oliy ligada 21-tur uchrashuvlari davom ettiriladi. "Navbahor" bu turda Bekobodning "Metallurg" klubini qabul qiladi. "Metallurg"ga qarshi o‘yin soat 18.00da Namangandagi "Markaziy" o‘yingohda boshlanadi.
21-tur kecha "Bunyodkor" - "Neftchi" (2:0) uchrashuvi orqali start olgandi.
Namanganda o‘tadigan uchrashuvga "Navbahor" va "Metallurg" jamoalari munosib tarzda hozirlik ko‘rishdi. Jamoamiz o‘yindan oldingi rasmiy mashg‘ulotni kecha kunning birinchi yarmida o‘tkazgan bo‘lsa "Metallurg" futbolchilari kechki payt "Markaziy" o‘yingohda tashkil etilgan mashg‘ulotda qatnashishdi.
Bugungi uchrashuv oldidan jamoamiz tarkibida yo‘qotish yo‘q. Bekobodliklar futbolchisi Doniyor Odilov sariq kartochkalari soni to‘rttaga yetganligi sababli 21-turni o‘tkazib yuboradi.
Raqiblar O‘zbekiston chempionatlarining oliy ligasida o‘zaro 39 marta kuch sinashishgan. 18 uchrashuvda futbolchilarimiz g‘alabani tantana qilishgan. “Metallurg”ning g‘alabalari soni esa 11 tani tashkil etmoqda. O‘nta uchrashuvda esa kuchlar teng kelgan. To‘plar nisbatidagi ko‘rsatkich 58-48, “Navbahor” foydasiga.
Ushbu jamoalarning o‘zaro qarama-qarshiliklaridagi eng yirik hisob 2003 yili qayd etilgan. O‘shanda jamoamiz “Metallurg”dan 7:0 hisobida ustun kelgan. Yana uchta uchrashuvda “Navbahor” 3:0 natija bilan zafar quchgan. “Metallurg” ham ikki bor futbolchilarimizni yirik hisobda mag‘lub etgan. 2000 yili Bekobodda ikkinchi tarkib bilan maydonga tushgan jamoamiz raqibga 0:3 hisobida imkoniyatni boy bergandi. 2016 mavsum yakunida Bekoboddagi “Metallurg” o‘yingohidagi uchrashuvda esa mezbonlar 5:1 hisobida g‘alaba qozonishgan.
Joriy yilgi chempionat birinchi davrasida Bekobodda o‘tgan o‘yinda hisob ochilmagandi.
Namanganda o‘tgan 19 ta uchrashuvda “Navbahor” 15 ta g‘alabani qo‘lga kiritgan. Uchta o‘yinda kuchlar teng kelgan bo‘lsa “Metallurg” bir marta Namangandan uch ochko bilan qaytgan. Bekobodliklar yagona g‘alabani 2016 yilgi mavsumda nishonlashgan. O‘yinlarda futbolchilarimiz raqib darvozasiga 41 ta to‘p kiritishgan bo‘lsa “Metallurg” Namanganda 10 ta gol urgan.
Bugungi uchrashuvni boshqarib boradigan Aziz Asimov joriy yilgi chempionatda ikkinchi bor "Navbahor" ishtirokidagi uchrashuvda ishlaydi.
Asimov bunga qadar birinchi davradan o‘rin olgan "So‘g‘diyona" - "Navbahor" uchrashuvini boshqargandi. Jizzaxdagi o‘yinda "Navbahor" 1:2 hisobida imkoniyatni boy bergandi.
Jizzaxdagi uchrashuvda har ikki jamoadan ikki nafardan futbolchini ogohlantirgan Asimovning xatti-harakatlari nazoratchi tomonidan 8,6 balga baholangandi.
