Angliya matbuotida “Arsenal” yarim himoyachisi Mesut Ozilga oid xabarlar tinmayapti. Sabab, Germaniya terma jamoasi futbolchisining “kanonirlar” bilan tuzgan shartnomasi yozda yakuniga yetadi.

O‘zil esa Arsen Venger qo‘l ostida ortiq to‘p surishni istamayapti. Ayni paytda 40-50 million yevro atrofida baholanayotgan futbolchidan London klubi daromad ko‘rish ilinjida, qishki mavsumda sotishni rejalashtirmoqda.

Xaridorlar ham tayin: “MYU”, “Milan” va “Fenerbaxche”. Ozil uchun kurashda Angliya va Italiya klublarining imkoniyatlari yuqori baholanayotganiga qaramay, ingliz nashrlari istanbulliklarni omadli hisoblamoqda.

Chunki Mesutning sevgilisi Amine Gunesh aynan “Fenerbaxche” tanlagan. Qolaversa, faqat 10-raqamli libosda maydonga tushishni istaydigan Mesut uchun Istanbul klubi rahbariyati uning istagini bajo keltirishga shay.