26 sentyabr kuni oliy liga 19-tur kechiktirilgan uchrashuvida "Paxtakor" "Mash’al" bilan o‘ynaydi.

Bellashuvni jamoamizdan Davron Hoshimov diskvalifikasiya tufayli o‘tkazib yuboradi. Muborakliklar safida bunday yo‘qotish mavjud emas.

Hozirgacha oliy ligada jamoalar 33 bor to‘qnash kelishgan. 22 o‘yinda "Paxtakor", 5 uchrashuvda "Mash’al" zafar quchgan. 6 bahs durang bilan yakunlangan. Raqib darvozasi 62 marta ishg‘ol etilib, 23 bor to‘p o‘tkazib yuborilgan.

Toshkentdagi 16 o‘yinning 14tasida "sherlar" g‘alaba qozongan. Raqib bir g‘alaba hamda durangni qayd etgan. So‘nggi marta "Mash’al" 2007 yil Toshkentda ochkoga ega chiqqan.

Uchrashuvni Temur To‘xtasinov boshchiligidagi hakamlar guruhi boshqaradi. U chempionatlarda "Paxtakor" ishtirokidagi 6 o‘yinda hakamlik qilgan. Jamoamiz o‘sha bellashuvlarda 4 g‘alaba va 2 durangni qayd qilgan.

"PAXTAKOR" - "MASH’AL"

Hakamlar: Temur To‘xtasinov (Andijon), Andrey Sapenko (Toshkent viloyati), Andrey Snetkov (Toshkent viloyati), Olim To‘ychiboyev (Toshkent).

Nazoratchi: Aleksandr Popov (Toshkent).

Yoshlar tarkiblari to‘qnashuvi 25 sentyabr, dushanba kuni soat 15:45da

"Jar" stadioni kichik maydonida boshlanadi. Asosiy jamoalar uchrashuvi 26 sentyabr, seshanba kuni "Paxtakor" stadionida 19:00da start oladi.

Ishqibozlardan jamoamizni stadionga kelib, qo‘llab-quvvatlashni so‘rab qolamiz!