Kelasi yili Rossiyada bo‘ladigan Jahon chempionati yo‘llanmalari uchun bahslari yakuniga yetib bormoqda. Xabaringiz bor, Osiyodan beshinchi yo‘llanma uchun Suriya va Avstraliya terma jamoalari kurash olib borishmoqda. Malayziyada bo‘lib o‘tgan dastlabki o‘yinda durang (1:1) qayd etilgan bo‘lsa, javob o‘yini 10 oktyabr kuni Avstraliya maydonida o‘tkaziladi.

Mazkur juftlik g‘olibi navbatdagi bosqichda KONKAKAF mintaqasida 4-o‘rinni egallagan terma jamoa bilan to‘qnash keladi. Xo‘sh, Shimoliy Amerikada saralash bosqichi qanday kechmoqda. Bu mintaqaga biroz nazar tashlaymiz.

KONKAKAFda so‘nggi guruh bosqichi yakunlanishiga 1ta tur qoldi. Meksika (21 ochko) va Kosta-Rika (16) terma jamoalari JCH-2018 yo‘llanmasini qo‘lga kiritib bo‘lishdi. AQSH 12 ochko bilan 3-o‘rinni band etib turgan bo‘lsa, Panama va Gonduras 10 ochkoga ega. Trinidad va Tobago bor-yo‘g‘i 3 ochko to‘plagan, ko‘rib turganingizdek, bu terma Rossiya-2018 yo‘llanmasi uchun kurashdan chiqqan.

1. Meksika — 21 ochko
2. Kosta-Rika — 16
3. AQSH — 12 (to‘plar farqi +5)
4. Panama  — 10 (-2)
5. Gonduras  — 10 (-7)
6. Trinidad va Tobago  — 3

So‘nggi, 10-tur o‘yinlari:
10 oktyabr
Gonduras - Meksika
Panama - Kosta Rika
Trinidad va Tobago - AQSH

To‘g‘ridan-to‘g‘ri beriladigan uchinchi yo‘llanmani qo‘lga kiritish uchun AQSH juda katta imkoniyatga ega. Birinchidan, amerikaliklar so‘nggi turda autsayder mehmoni bo‘lishadi. Ikkinchidan, jamoa durang o‘ynasa ham JCH-2018 yo‘llanmasiga ega bo‘ladi. Har holda, Panama so‘nggi turda Kosta-Rikani 8ta to‘p farqi bilan yengmasa kerak.

Demak, qit’alararo pley-off uchun yo‘llanma Panama va Gonduras terma jamoalaridan biriga nasib etadi. Gondurasliklar oxirgi turda Meksikani qabul qilishini hamda hozirda salbiy to‘plar nisbatiga ega bo‘lib turganini inobatga olsak, Suriya yoki Avstraliyaning raqibi, katta ehtimol bilan, Panama bo‘ladi. Barcha narsa panamaliklarning qo‘lida. Jamoa so‘nggi turda yutqazib qo‘ymasa, Osiyo vakili bilan to‘qnash keladi.

Qit’alararo pley-off bosqichining dastlabki o‘yini 6 noyabr kuni KONKAKAF vakili maydonida, javob bahsi 14 noyabr kuni OFK vakili uyida bo‘lib o‘tadi.