Oliy liga 19-turining qoldirilgan uchrashuvida «Paxtakor» o‘z uyida «Mash’al»ni qabul qildi. E’tiborga molik jihati shundaki, muborakliklar ikkinchi davrada hali umuman mag‘lubiyatga uchrashmagandi.
Boz ustiga, «Qo‘qon-1912» maydonidan uch ochko olib qaytishni uddalashgandi. Garchi Aleksandr Xomyakov sho-girdlari «sherlar»ga ham munosib qarshilik ko‘rsatishsada, tajriba va mahorat uyg‘unligi poytaxtliklarning g‘alabasini ta’minladi.
Shu tariqa «Mash’al» ikkinchi davrada ilk marta maydonni ochkosiz tark etdi. Biz «Paxtakor»ga qarshi kechgan o‘yindan so‘ng mehmonlar himoyachisi Sardor Rahmonov bilan suhbatlashdik.
- Sardor, avvalo, o‘yin haqidagi fikringizni bilmoqchi edim. «Paxtakor»dan shunday hujumkor futbol kutganmidinglar?
- Ha, albatta. «Paxtakor» so‘nggi uchrashuvlarida hujumkor, kuchli pressingga asoslangan futbol namoyish etyapti. Biz bilan bo‘lib o‘tgan bahsda ham xuddi shunday o‘yin guvohiga aylandik.
- Murabbiylar uchrashuv oldidan sizlarga qanday ko‘rsatma berishgandi?
- Ehtiyotkor bo‘lib harakat qilish va asosan himoyadan o‘ynash kerakligini aytishgandi. Umuman olganda, o‘yin biz uchun yomon boshlanmagandi. Lekin birinchi golni o‘tkazib yuborganimizdan keyin hammasi o‘zgarib ketdi.
- «Paxtakor» «Mash’al»dan o‘yin bobida ustun edimi?
- Menimcha, birinchi bo‘limda mezbonlar ustunroq ko‘rinishdi. Buni tan olish kerak. Ammo tanaffusdan so‘ng bizning o‘yinimizda ham jonlanish kuzatildi va yaxshiroq harakatlana boshladik. Lekin bu yakuniy natijada aks etmadi.
- «Mash’al» mazkur o‘yini bilan shunday mag‘lubiyatga loyiqmidi? Yoki «Paxtakor» tajribali futbolchilari evaziga g‘alaba qozondimi?
- Bunday mag‘lubiyatga loyiq emasdik. Siz aytgandek, «Paxtakor» tajribali futbolchilari evaziga o‘yinda g‘alabaga erishdi. Terma jamoa a’zolari hamda legionerlar uchrashuv taqdirini hal qilishdi, deyish mumkin. Afsuski, klubimizning ikkinchi davradagi ilk mag‘lubiyatini qabul qilib oldik. Qolaversa, yutqazishimizga o‘z xatolarimiz ham sabab bo‘ldi.
- Jamoa ushbu mag‘lubiyatdan so‘ng kuchli beshlikdan biroz uzoqlashgandek...
- Ha, xuddi shunday. Endi ikkinchi o‘rindagi jamoadan 7 ochkoga ortda qolyapmiz. Lekin oldinda yetarlicha o‘yinlar bor. Vaziyatni yana ijobiy tomonga o‘zgartirish uchun bizda hali imkoniyat bo‘ladi. Kutilmagan natijalar boshqa qayd etilmaydi, deb hech kim kafolat berolmaydi. Kuchlilar safida qolish uchun kurashayotgan jamoalar har qanday raqibga jiddiy qarshilik ko‘rsatib, ochko tortib olishlari mumkin.
- Agar «Mash’al» kuchli beshlikka kira olmasa, bu jamoa uchun salbiy natijaga aylanadimi?
