“Lokomotiv” jamoasi O‘zbekiston milliy chempionatlari doirasida “Navbahor”ga qarshi shu paytga qadar 25ta uchrashuv o‘tkazgan. Ularning 13tasi “temiryo‘lchilar” foydasiga hal bo‘lgan. 7ta bahsda esa namanganliklarning qo‘li baland kelgan. Yana 5ta o‘yinda jamoalar murosa ko‘chasini tanlashgan – durang. Umumiy ustunlik “Lokomotiv” futbolchilari tomonida.

Ta’kidlash joizki, “Loko” vakillari namanganlik darvozabonlarni 45 marta “hafa qilishgan”. O‘z darvozamizdan esa ushbu jamoaga qarshi bellashuvlarda 36 bor to‘p o‘tkazib yuborganmiz.

“Lokomotiv” “Navbahor” jamoasi ustidan qozongan eng yirik hisobdagi g‘alabasiga 2016 yilda ikkinchi davra doirasida o‘tgan o‘yinda erishgan. O‘shanda “lochinlar”ni o‘z uyida qabul qilgan toshkentliklar raqibni 5:0 hisobida tor-mor etishgandi.

Joriy yilgi mavsumda esa ushbu ikki klubning dastlabki o‘yini 4 may kuni 9-tur doirasida bo‘lib o‘tdi va unda 2:2 hisobi qayd etildi. O‘sha uchrashuvda jamoamiz safida kiritilgan gollarga Sardor Mirzayev hamda Marat Bikmayev mualliflik qilgandi.

Yana bir diqqatga sazovor jihat shundan iboratki, “Lokomotiv” 2010 yildan buyon “Navbahor”ga yutkazmasdan kelmoqda.