“Nyukasl” jamoasining filippinlik muxlisi — Kendrik Mon De Leon katta pul sarflab, Angliyaga uchib keldi.

Mon De Leon muxlislik qiladigan jamoasi “Nyukasl”ning Angliya chempionati doirasida “Sautgempton”ga qarshi o‘yinini ko‘rish uchun uchrashuv o‘tkaziladigan stadionga bordi.

Biroq bechora muxlis o‘yinni stadionda tomosha qilishdek uzoq kutilgan orzusiga erisha olmadi.

Uning rejasi chippakka chiqdi, Hayolidan o‘tkazgan ming bir taassurotlar yo‘qqa chiqarildi, oxir oqibat sarf-xarajatlariga kuyib, o‘z vataniga qaytishga majbur bo‘ldi.

Gap shundaki, 14 oktyabr kuni o‘tkazilishi kerak bo‘lgan “Sautgempton”–“Nyukasl” uchrashuvi favqulodda bir kun ortga surildi. Kendrik shoshilgan mazkur o‘yin kecha, 15 oktyabr kuni o‘tkazildi.

Kendrik esa samolyotga olgan qaytish chiptasini boshqasiga almashtira olmadi. Aynan shu sabab tufayli o‘yinni stadionda tomosha qila olmasdan Filippinga qaytib ketdi.

“Balkim men “Nyukasl”ning Filippindagi yagona muxlisidirman. O‘yinni ko‘rgani 11 ming km masofani uchib o‘tdim.

Biroq uchrashuv mening qaytish vaqtimga to‘g‘ri kelib qoldi. Afsus, sevimli jamoam o‘yinini ko‘rish nasib etmadi”, deya izoh qoldiradi Kendrik Mon De Leon ijtimoiy tarmoqdagi sahifasida.

Ma’lumot uchun, “Sautgempton” maydoniga safar uyushtirgan “Nyukasl” 2:2 hisobida durang o‘ynab qaytdi.

Akmalxon Eshonxonov