Bugun “Markaziy” stadionimizda oliy liga 25-turi doirasidagi “Nasaf” - “Dinamo” uchrashuvi bo‘lib o‘tadi. Uchrashuv soat 18:00da boshlanadi.
Oliy liga, 25-tur
“Nasaf” (Qarshi) – “Dinamo” (Samarqand)
20.10.2017. “Markaziy” stadion. 18:00da
Bosh hakam: Viktor Serazetdinov (Toshkent)
Qanot hakamlari: Andrey Sapenko (Toshk.vil.) Sultonmurod Ulfatov (Toshkent)
Zaxira hakami: Elyor Tursunov (Buxoro)
Nazoratchi: Sayfiddin Irmatov (Toshkent)
O‘zPFL vakili: Roman Chernikov.
“Nasaf” hamda “Dinamo” jamoalari bugun oliy ligadagi o‘zaro 38-uchrashuvida maydonga tushishadi. Bungacha jamoalar 37 bor kuch sinashishgan. Natijalar jamoamizning ustunligini ko‘rsatmoqda. Bo‘lib o‘tgan 19 uchrashuvda “Nasaf”, 7 o‘yinda esa “Dinamo” g‘alabaga erishgan. 11 uchrashuvda durang natijasi qayd etilgan. To‘plar nisbati 52:35ga teng. Ustunlik “Nasaf” tarafida.
Qarshida bo‘lib o‘tgan 18 uchrashuvning 13tasida "Nasaf" g‘alaba qozongan. 2 uchrashuvda samarqandliklarning qo‘li baland kelgan. Qolgan 3 uchrashuvda kuchlar teng kelgan. “Dinamo” so‘nggi bor 2011 yili Qarshidan uch ochko bilan qaytgan. “Nasaf” olti uchrashuvki, chempionatdagi g‘alabali seriyasini davom ettirib kelmoqda.
Bugungi uchrashuvda "Nasaf"ga Igor Golban va Farrux Sayfiyevlar yordam bera olishmaydi. Albatta bu jiddiy yo‘qotish hisoblanadi. Bu futbolchilarning sariq kartochkalari soni to‘rttaga yetgan.
Bugun futbol ishqibozlari mazkur jamoalar ishtirokidagi qiziqarli uchrashuvga guvoh bo‘lishlari aniq. Jamoalar turnir jadvalida qanday o‘rinda borishlariga qaramasdan doimo maydonda murosasiz bo‘lishgan. Bugun ham shunday bahs bo‘lishi aniq.
Shunday ekan, “Nasaf” – “Dinamo” uchrashuviga marhamat qiling! “Markaziy” stadion sizga muntazir!
