Eron terma jamoasi birinchilardan bo‘lib jahon chempionati yo‘llanmasini qo‘lga kiritdi. Karlush Keyrush jamoasi safida ko‘plab futbolchilar o‘zlarini ko‘rsatishdi.
Shundaylardan biri Sardor Azmundir. Yaqinda eronliklar «Qozon Arena»da Rossiya terma jamoasiga qarshi o‘rtoqlik uchrashuvini o‘tkazishdi.
E’tiborli tomoni, Azmun «Rubin» safida xuddi ana shu stadionda muntazam ravishda maydonga tushadi.
O‘yindan oldin bo‘lib o‘tgan matbuot anjumanida Karlush Keyrush bilan birga Rossiya chempionatidan xabardor bo‘lgan Sardor Azmun va Said Izzatullohlar ham ishtirok etishdi.
- Eron terma jamoasining asosiy yulduzisiz. O‘yin Qozon shahrida o‘tkaziladi. Bu siz uchun muhim ahamiyat kasb etadimi?
Sardor Azmun: - Terma jamoamizdagi har bir o‘yinchi - darvozabondan tortib, hujumchigacha barchasi yulduz. Bizning vazifamiz - murabbiy ko‘rsatmalarini bajarish. Men futbolchilarni o‘z yurtida va xorijda o‘ynaydiganlarga ajratmayman. To‘g‘ri, Erondan tashqarida to‘p suradiganlarga e’tibor katta. Biroq milliy chempionatda ham bir qator kuchli futbolchilar bor.
- Ko‘pchilikning fikricha, joriy mavsumda siz o‘sishdan to‘xtab qoldingiz.
- Tanqidni to‘g‘ri qabul qilaman. Lekin bunday narsalarni murabbiy hal etadi. Har qanday futbolchi yiqiladi, yuqoriga parvoz qiladi. «Rostov» va «Rubin»dagi muxlislarning qo‘llab-quvvatlashi yordamida o‘sishda davom etaman.
Said Izzatulloh: - Biz uchun Rossiya bilan o‘ynash juda muhim. Chunki har ikki jamoa ham rivojlanmoqda.
- Rossiya premyer-ligasida o‘sishda davom etyapman, deb o‘ylaysizmi?
- RFPLda o‘ynash - yaxshi tajriba. O‘tgan mavsum Chempionlar Ligasida qatnashdim. Joriy yil qiyin kechmoqda. Ammo meni qo‘llashlarini his qilib turibman. Shuningdek, Karlush Keyrush ham ko‘maklashishda davom etmoqda.
«Amkar»ga qarshi o‘tkazgan o‘yinimiz bizning to‘g‘ri yo‘lda ekanimizni ko‘rsatdi. Ayni payt faqat jahon chempionati haqida o‘ylayapman.
