«Barselona» bosh murabbiyi Ernesto Valverde La ligasining 9-turi doirasida «Malaga»ga qarshi bo‘lib o‘tgan o‘yin (2:0) borasida o‘z fikrlarini bildirib o‘tdi.

«Haqiqat shundaki, birinchi bo‘limda bizga o‘yin ritmi yetishmadi. Balki jismoniy charchoqdan ham ko‘ra ruhiy toliqish ketayotgandir. Axir biz bir haftadan kamroq vaqt ichida 3ta o‘yin o‘tkazdik. Baxtimizga ikkinchi bo‘limda o‘yinimizni yaxshiladik va ustunlikni mustahkamlash uchun ko‘proq vaziyatlar yaratdik.

Suares? Uning vaziyatlardan foydalana olmagani meni xavotirga solmaydi. Hujumchilar uchun birinchi navbatda imkoniyatlar yuzaga kelishi muhim ahamiyatga ega. «Atletiko»ga qarshi o‘yinda u ajoyib o‘ynadi, «Olimpiakos» darvozasini ham ishg‘ol qilishga yaqin kelgandi. Uning tajovuzkorligi va faolligi bizga naf keltiradi. Luis Suares biz uchun qadrli. Men unda muammolarni ko‘rmayapman», — dedi Valverde.