«Барселона» бош мураббийи Эрнесто Вальверде Ла лигасининг 9-тури доирасида «Малага»га қарши бўлиб ўтган ўйин (2:0) борасида ўз фикрларини билдириб ўтди.

«Ҳақиқат шундаки, биринчи бўлимда бизга ўйин ритми етишмади. Балки жисмоний чарчоқдан ҳам кўра руҳий толиқиш кетаётгандир. Ахир биз бир ҳафтадан камроқ вақт ичида 3та ўйин ўтказдик. Бахтимизга иккинчи бўлимда ўйинимизни яхшиладик ва устунликни мустаҳкамлаш учун кўпроқ вазиятлар яратдик.

Суарес? Унинг вазиятлардан фойдалана олмагани мени хавотирга солмайди. Ҳужумчилар учун биринчи навбатда имкониятлар юзага келиши муҳим аҳамиятга эга. «Атлетико»га қарши ўйинда у ажойиб ўйнади, «Олимпиакос» дарвозасини ҳам ишғол қилишга яқин келганди. Унинг тажовузкорлиги ва фаоллиги бизга наф келтиради. Луис Суарес биз учун қадрли. Мен унда муаммоларни кўрмаяпман», — деди Вальверде.