Angliyaning “Everton” klubi ijtimoiy tarmog‘i murabbiy Ronald Kumanni egallab turgan lavozimidan ozod etgani haqida xabar berdi.

Ma’lumotlarga ko‘ra, klub direktorlar kengashi va jamoa aksioneri Kumanning “Everton”da o‘tkazgan so‘nggi 16 oyi va jamoa o‘tgan mavsum APLda 7-o‘rinni egallagani uchun minnatdorchilik bildirishgan.

Eslatib o‘tamiz, 54 yoshli mutaxassis “Everton”da 2016 yildan beri faoliyat olib borardi.

Ma’lumot uchun, “Everton” joriy mavsum 9 turdan so‘ng 8 ochko jamg‘arib, 18 o‘rinni egallab turibdi. Shuningdek, Kuman shogirdlari kecha o‘z maydonlarida “Arsenal” klubiga 2:5 hisobida imkoniyatni boy berib qo‘yishgandi.