O‘FFning yangi rahbariyati birdaniga katta islohotlarga qo‘l urib, barcha muxlislarda kelajakka ishonch hissini oshirdi. Ayniqsa, hakamlarga nisbatan qattiqqo‘llik qilinayotgani ko‘pchilikka yoqqani aniq.

Chunki hakamlarning xatolari yoki noxolis ishlaridan zada bo‘lib ketgandik. Ammo bu masalada, ya’ni ularni jazolashda me’yorni unutmaslik kerak. Xullas, hakamlik ishini tartibga solish uchun «oltin o‘rta»ni mahkam ushlash talab etiladi. Zero, futbolning eng nozik jihati ham aynan hakamlikka bog‘liq.

Chunki bu ishda inson faktori asosiy rolda. Referi o‘yinni qachon sifatli boshqaradi? Qachonki, mutlaqo erkinlikni his qilsa, bosimdan xoli bo‘lsa.

Demoqchimanki, hakamlarga nisbatan o‘ta qattiqqo‘l munosabatda bo‘lish ba’zilarga salbiy ta’sir qilishi hech gap emas.

Bunday holatda ayniqsa, yosh hakamlar qiynalib qolishadi. Oddiy aytganda, ular xato qilishdan cho‘chib, o‘yin tizginini qo‘ldan chiqarib yuborishlari mumkin. Ha, noxolis hakamlik ildiziga bolta urish uchun jazo choralarini keskinlashtirish muhim.

Ammo shuning barobarida tanganing ikkinchi tomonini ham o‘ylash talab etiladi. Aks holda, hakamlik tizimi izdan chiqib ketadi.

Ishonamanki, Hakamlar qo‘mitasi bu borada barchasini me’yorga solish uddasidan chiqadi. Buning uchun ishtiyoqli yoshlar xulosalari bilan birga ba’zi tajribali mutaxassislar maslahatlari inobatga olinsa, bas.

Komil DO‘STMURODOV, Namangan shahri.