Oliy Liga 28-turi doirasida Samarqandda Farg‘onaning “Neftchi” klubini qabul qilgan «Dinamo» jamoasi juda muhim g‘alabaga erishdi.
Uchrashuvdan keyin «Dinamo» bosh murabbiyi Oleg Tyulkin uchrashuv borasida fikr bildirdi.
«Kurashlarga boy murosasiz uchrashuv guvohiga aylandik. Biz osonlikcha taslim bo‘lmasligimizni isbotlay oldik. Butun uchrashuv davomida yigitlarimiz faqat g‘alaba ilinjida oldinga borishdi va nihoyat maqsadimizga yetib gol ura oldik. Himoyachi bo‘lishiga qaramay Adnan Oraxovas uchrashuv davomida hujum chizig‘ini ham kuchaytirishga intildi. Yakunda bosh bilan ajoyib gol urib, g‘alaba keltirdi. Yigitlarimizdan minnatdormiz. Ko‘rib turibsiz, «Dinamo» futbolchilari nafaqat jamoa yoki muxlislar uchun, balki o‘z sha’nilari uchun, keyingi yil Oliy Ligada to‘p surish uchun maydonda bor imkoniyatlarini ishga solishmoqda. Bugungi bahsda buni yana bir bor isbotlashdi. «Dinamo» ligada qolish uchun so‘nggi nafasgacha kurashadi.
«Neftchi» jamoasining oxirgi bahsda amaldagi chempion «Lokomotiv» bilan durang o‘ynaganligi bu jamoaning kuchini bildirardi. Muhimi bugun uch ochkoni oldik, endi keyingi turda yana o‘z maydonimizda «Lokomotiv»ga qarshi maydonga tushamiz. Samarqandlik muxlislar jamoamizni bugungidek qo‘llab-quvvatlab tursalar, amaldagi chempion bilan ham jiddiy kurash olib boramiz» - deydi Oleg Pavlovich.
"Dinamo" klubi Matbuot xizmati.
