Matbuot anjumanining navbatdagi qismida jamoamiz ustozi Ro‘ziqul Sa’dullayevich o‘yin haqida quyidagi fikrlarni bildirdi.

"Bugun uchta gol bilan g‘alabaga erishdik. Ammo biz bu hisobni birinchi bo‘limdayoq tabloga yozdirib qo‘yishimiz mumkin edi. Juda ko‘p vaziyatlarni puchga chiqardik. O‘yin to‘liq ustunligimizda o‘tdi. “Sho‘rtan” jamoasini bugun himoyada o‘ynashini bilar edik. Tezkor kiritgan golimiz ishimizni ancha osonlashtirdi. Bunda Abdurahimov professionallarcha harakat qildi. Umuman, kerakli g‘alabani qo‘lga kiritganimizdan mamnunman.

Penaltini nega Cheran amalga oshirmadi? Bugungi o‘yinda agar penalti bo‘lsa, kim uni amalga oshirishini oldindan rejalashtirganimiz yo‘q edi. Buni maydondagi o‘yinchilarning o‘zi hal qilishdi.

Bugun Bobur Abduxoliqov bizga yordam bera olmadi, u o‘tgan o‘yinda kichik jarohat olgan edi, shunga tavakkal qilishni hohlamadik. Bugun yana o‘yin davomida yetakchilarni almashtirdik, bunga sabab keyingi muhim o‘yinimizni ham hisobga olganimiz bo‘ldi.

Yigitlarga endi uch kun ta’til beramiz. Jamoamiz 13 noyabrdan yig‘iladi va navbatdagi o‘yinga tayyorgarlikni boshlashadi. Mashg‘ulotlarni yordamchi murabbiylarimiz Minchev va Sibagatullin o‘tkazib turishadi. Biz esa 15 noyabrdan mashg‘ulotlarga qo‘shilamiz", - dedi Berdiyev.