Yevropada JCH-2018 yo‘llanmasini qo‘lga kiritgan so‘nggi jamoaning nomi aniq bo‘ldi. Irlandiya terma jamoasi o‘z maydonida Daniyani qabul qildi hamda yirik hisobda imkoniyatni boy berdi.

Uchrashuvning 6-daqiqasida Daffi gol urib, mezbon jamoa muxlislariga quvonch ulashdi. Ammo 29-daqiqada daniyaliklar avtogol tufayli hisobni tenglashtirishdi. O‘yinning qolgan daqiqalari Kristian Eriksenning benefisiga aylanib ketdi. "Tottenxem" yarim himoyachisi 32-daqiqada mehmonlarni hisobda oldinga olib chiqqan bo‘lsa, u ikkinchi taymda o‘z hisobiga yana gol yozib, bahsda xet-trikni rasmiylashtirdi.

O‘yinga qo‘shib berilgan daqiqalarda Bendtner penaltidan hisobni 1:5 ko‘rinishiga keltirdi. Shu tariqa, Daniya JCH-2018 yo‘llanmasini rasmiylashtirdi.

Eslatib o‘tamiz, Daniyada bo‘lib o‘tgan dastlabki o‘yinda hisob ochilmagandi.

JCH-2018 saralash, pley-off, javob o‘yini
Irlandiya – Daniya 1:5 (1:2, 0:3)
Gollar: 1:0 – 6 Daffi, 1:1 – 29, avtogol Kristi, 1:2 – 32 Eriksen, 1:3 – 63 Eriksen, 1:4 – 73 Eriksen, 1:5 – 90, penalti Bendtner.
Irlandiya – Rendolf, Klark (Long, 71), Daffi, Uord, Kristi, Meyler (Xulaxan, 46), Makkleyn, Breydi, Xendrik, Arter (Makgidi, 46), Merfi.
Daniya – Shmeyxel, Kyer, Byelland, Kristensen, Larsen (Ankersen, 54), Dileyni, Kvist, Eriksen, Sisto, Poulsen (Kornelius, 70), Yorgensen (Bendtner, 84).
Dastlabki o‘yin – 0:0