Avvalroq o‘zbekistonlik aralash qoidali janglar ustasi Murod Xonto‘rayevning (“Osiyo ayig‘i”) Bishkek shahrida navbatdagi jangi bo‘lib o‘tishi haqida ma’lumot bergan edik.

Ushbu turnir 18 ta jangdan iborat bo‘ldi. 3 ta jangda sportchilar chempionlik jangini o‘tkazishgan bo‘lsa, qolgan 30 sportchi o‘zaro reyting janglarida qatnashishdi.

Eslatib o‘tish kerak, turnirning bosh hakami hamyurtimiz Nodir Qodirov bo‘ldi.

Turnirning markaziy jangi Murod Xonto‘rayev va rossiyalik Konstantin Andreysevlar ishtirokida bo‘ldi.

Afsuski, ushbu jangda sportchimiz birinchi raunddayoq imkoniyatni boy berib qo‘ydi.

Turnirda ishtirok etgan sportchi Nursulton Ro‘ziboyev (“Bleyk”) esa Qirg‘iziston poytaxti Bishkek shahrida “WEF Global 10” turniri doirasidagi jangida mezbon sportchi Erbo‘lat Omurzakovga qarshi oktagonga chiqdi.

Jangda durang natija qayd etildi va qoidaga ko‘ra o‘zbekistonlik sportchi chempionlik kamarini o‘zida saqlab qoldi.

Eslatib o‘tamiz, Nursulton Rossiyaning Yekaterinburg shahrida chechenistonlik raqibini muddatidan avval mag‘lub etgan va Ramzan Qodirov tomonidan yengil avtomobil bilan taqdirlangan edi.