Shota Arveladze "Paxtakor"ni 2017 yilgi mavsum ikkinchi davrasidan boshqarishga kirishdi.
Uning boshchiligida jamoa o‘yini va natijalarida o‘sish kuzatildi. "Paxtakor" ko‘proq gol urib, kamroq to‘p o‘tkazdi. Tabiiyki, ikkinchi davrada to‘plangan ochkolar miqdori birinchi davradagidan yuqori bo‘ldi. "Sherlar" ikkinchi davrada 25 to‘p kiritib, 9 gol o‘tkazib yuborishdi. Birinchi davrada bu natija 19-19ni tashkil qilgandi.
Arveladze qo‘l ostida jamoa birinchi golini urish uchun 13 daqiqa sarfladi. "Qizilqum"ga qarshi Navoiydagi bellashuvda Suhrob Nurullayev darvozani ishg‘ol qilgandi.
Gruziyalik mutaxassis qo‘l ostida eng yirik g‘alaba "Neftchi"ga qarshi o‘yinda qo‘lga kiritildi. O‘shanda "sherlar" 6:0 hisobida zafar quchishgandi.
Ikkinchi davrada 35 ochko jamg‘arildi. Birinchi davrada jamoamiz 24 ochko to‘plagandi. Mavsumning ikkinchi yarmida "Paxtakor" 10 ochko yo‘qotdi. Uydagi g‘alabali seriya 11 uchrashuvga yetdi va jamoamiz buni davom ettirish imkoniyatiga ega.
