Mamlakatimizda bolalar futbolini rivojlantirish, hududlarda bolalar va o‘smirlar orasida futbolni yanada ommalashtirish borasida O‘zbekiston Futbol Federasiyasi bir qator chora-tadbirlarni amalga oshirmoqda. 

Bu borada birinchi galda bolalar murabbiylarining malakasini, bilim saviyasini oshirish masalasiga alohida ahamiyat qaratilyapti. Futbol maktablarida Yevropaning futboli rivojlangan mamlakatlari o‘quv-metodikasi asosida ish olib borish, bolalar bilan mashg‘ulotlarni yangi uslubda, Yevropa andozalariga mos ravishda o‘tkazish va shu yo‘l orqali yuqori saviyali futbolchilarni tayyorlashga katta ahamiyat qaratilmoqda. 

Mana shu maqsadda, viloyatlar to‘rtta hududga bo‘lingan holda, har bir hudud uchun bir nafardan xorijlik mutaxassis jalb qilinadi. 

1-hudud: Qoraqalpog‘iston Respublikasi, Xorazm, Buxoro. Markaz – Nukus shahri.

2-hudud: Navoiy, Samarqand, Surxondaryo, Qashqadaryo. Markaz – Qarshi shahri.

3-hudud: Andijon, Farg‘ona, Namangan. Markaz – Farg‘ona shahri.

4-hudud: Sirdaryo, Jizzax, Toshkent viloyatlari va Toshkent shahri. Markaz – Toshkent shahri. 

O‘zbekiston Futbol Federasiyasi ayni paytda serbiyalik bir qator mutaxassislar bilan muzokaralar olib boryapti. Tez orada muzokaralar yakuniga yetib, tegishli shartnomalar imzolanadi. 

Xorijdan tashrif buyuradigan mutaxassis, dastlab, 3-hudud hisoblangan vodiyda ish boshlaydi. Boshqa hududlar uchun Yevropaning boshqa davlatlaridan ham mutaxassislarni jalb qilish rejalashtirilgan.   

Yurtimizga tashrif buyuradigan mutaxassislar hududlarda bolalar futboli murabbiylari va seleksionerlar bilan ish olib borishadi. Ularga yosh futbolchilarni futbol maktablariga saralab olish, o‘quv-mashg‘ulotlarini o‘tkazish, iste’dodli futbolchilarning mahoratini sayqallab borish bo‘yicha kerakli maslahalar berib borishadi.