Xosep Gvardiola bu mutaxassis xizmatlaridan voz kechgandi, ammo u yana qaytdi. Ayrim mamlakatlarda ushbu shifokorning uslublariga taqiq qo‘yilgan.
Gap ispaniyalik murabbiy davrida «Bavariya»ni tark etib, hozir yana myunxenliklar safiga qaytgan tibbiyot xodimi Gans-Vilgelm Myuller-Volfart haqida bormoqda.
2014|2015 yillar mavsumi Germaniya kubogi doirasidagi «Bayer» va «Bavariya» jamoalari o‘rtasidagi bahsning 34-daqiqasida Mehdi Benatya tibbiyot xodimlari ko‘magida maydonni tark etdi. Xosep Gvardiola shu zahoti zaxira o‘rindig‘i tomon yuzlanib, jamoa shifokori Gans-Vilgelm Myuller-Volfartni istehzoli qarsak bilan «siyladi». Navbatdagi jarohat asosiy tarkibning yana bir a’zosini safdan chiqargandi.
Oradan bir hafta o‘tib, 73 yoshli shifokor iste’foga chiqdi. 40 yildan buyon shu klubga xizmat qilgan mutaxassisni ishdan bo‘shatish Gvardiolaning xohishiga ko‘ra amalga oshirilganiga hech kim shubha qilmasdi. O‘sha pallada «lazaret»da asosiy tarkibning 6 nafar a’zosi davolanayotgan, shu bois bosh shifokor bor aybni o‘ziga olgandi.
- «Portu»dan qabul qilingan 1:3 hisobidagi mag‘lubiyat o‘yinchilar emas, mening aybim, - dedi Gvardiola o‘yindan so‘ng. - Ikki yil mobaynida futbolchilarimiz umumiy hisobda 30 marta operasiya qilindi, ammo biz baribir, chempionat va kubok bahslarida g‘olib chiqdik. Myuller-Volfart malakali mutaxassis. O‘yinchilar shifokorga ishonishgani yaxshi, ammo men shogirdlarim safimizga imkon qadar tezroq qaytishlarini xohlayman.
Ispaniyalik murabbiy shu tariqa tibbiyotchilar guruhining sust ishlayotganiga sha’ma qildi. Gans-Vilgelm keyingi ikki yilni o‘zining Myunxendagi klinikasida faoliyat yuritish bilan o‘tkazdi.
U nimasi bilan mashhur?
Myuller-Volfart - dunyodagi eng dongdor sport shifokori. Shu bilan birga uning davolash uslubi bir necha yillardan buyon muhokamalarga sabab bo‘lib kelmoqda. Ammo fakt faktligicha qoladi - u nafaqat yulduzlar, balki sportdan yiroq bo‘lganlar uchun ham mashhur sanaladi.
Gans-Vilgelm Stiven Jerrard, Maykl Ouen, Yurgen Klinsmann, Ronaldo, tennischi Boris Bekker, konkichi Ivan Skobrev, bokschi Vladimir Klichko, opera xonandasi Luchano Pavarotti, U2 Bono guruhi solisti hamda ko‘plab boshqa shaxslarning jarohatdan qutulishlariga yordam bergan. Shuningdek, dunyoning eng tezkor sportchisi Useyn Bolt ham umrining so‘nggi damlarigacha bu shifokordan minnatdor bo‘lishini ta’kidlagan.
2012 yilgi Olimpiada o‘yinlari arafasida yamaykalik sprinterning musobaqalarda qatnashishi so‘roq ostida turgandi - belida kuchli og‘riq sezayotgandi.
Boltning murabbiyi esa noodatiy davolash uslubidan foydalanuvchi germaniyalik shifokorga uchrashni tavsiya qildi. Yengil atletika yulduzining tinimsiz mashg‘ulot o‘tkazishiga murabbiyning ko‘zi yetmayotgan, organizmi katta yuklamalarga dosh bera olmasligidan cho‘chirdi.
Myuller-Volfart mashqlar ro‘yxatini yozib, Useyn ularni bajarsa, hammasi yaxshi bo‘lishini ta’kidladi. Bolt uddaladi, shifokor esa davolashni boshladi.
Sprinter bir necha oyni germaniyalik mutaxassis nazoratida o‘tkazdi, Gans-Vilgelm turli in’eksiyalarni qo‘llab, to‘qimalar tiklanishini kuzatdi. Oxir-oqibat Useyn Olimpiadada uch karra chempionga aylandi.
Myuller-Volfart ikkinchi jahon urushi payti ruhoniy oilasida tug‘ildi, uning shifokorlikka qiziqishi otasiga yoqmadi. Ammo oiladagi qarshiliklarga qaramay, Gans Vilgelm tibbiyot universitetini tamomlab, 33 yoshida «Gerta»da ish boshladi. 1977 yilda esa «Bavariya»ga ko‘chib o‘tdi.
- Juda yosh edim va ular muvaffaqiyat qozonishimni kutishardi, - deya eslaydi malakali shifokor. - Superyulduzlar olamiga tushib qolgandim. «Bavariya» qatorasiga uch marta Yevropaning eng yaxshi jamoasiga aylandi.
Bu klubda Frans Bekkenbauer, Gerd Myuller, Zepp Mayer to‘p surishardi. Men ularning sog‘lig‘iga javobgar edim. O‘sha paytgacha qo‘llanmagan terapiyani kashf etib, undan foydalana boshladim.
Birin-ketin gomeopatik preparatlarni ishlatdim va urinishlarim hamisha foyda keltirardi. Futbolchilarning organizmini tinglab, muammoni aniqlayman, so‘ngra shunga mos dori vositasini tanlayman. Agar davolash jarayoni ko‘ngildagidek kechsa, uni yana qaytaraman. Hammasi oddiy.
U qanday uslubdan foydalanadi? DAVOMI
