“Lokomotiv” PFK tashabbusi va homiyligida 2011 va 2012 yilda tug‘ilgan yosh futbolchilar o‘rtasida futbol festivali bo‘lib o‘tdi. Festivalda 2011 yilda tug‘ilgan tarbiyalanuvchilardan iborat “BFL-A", “BFL-1”, “BFL-2” (Lokomotiv PFK guruhlari), “Paxtakor-2011” (“Paxtakor” FK Akademiyasi), Odil Junior, “MEGA-S”, 2012 yilda tug‘ilgan tarbiyalanuvchilardan tashkil topgan “Loko-J", “Loko-J2”, “MEGA-S-1”, “MEGA-S-2” jamoalari ishtirok etishdi.

2011 yilda tug‘ilgan yosh futbolchilardan orasida ayniqsa, Shoahmad Kabirov murabbiyligidagi “Paxtakor-2011” jamoasi chiroyli o‘yinlari bilan musobaqa mehmonlari va tomoshabinlar olqishlariga sazovor bo‘ldi. Yosh murabbiyning shogirdlari “BFL-A” jamoasini 4:2, “BFL-2” jamoasini 8:0 hisobida mag‘lub etishdi. Musobaqa davomida shuningdek, “BFL-A”, “Odil Junior”, “MEGA-S” jamoalari tarkibida bir qator iqtidorlar borligi ko‘rindi.

Festival yakunlangach, barcha ishtirokchi jamoalar diplom va sovg‘alar bilan taqdirlandi. Taqdirlash marosimida “Lokomotiv” PFK yarim himoyachisi Temur Kapadze ishtirok etdi.

Bunday futbol festivallari O‘zbekistonda yosh iqtidorlar saralanishi va bolalar futboli rivojlanishida muhim o‘rin tutadi. Ana shunday festivallarni tashkillashtirayotgan “Lokomotiv” PFK yurtimizda bolalar futbolini rivojlanishida o‘ziga xos hissa qo‘shadi va kelajakda klubga ulkan muvaffaqiyatlar tilab qolamiz.

Baxtiyor RASULOV