Klublar o‘rtasidagi jahon chempionatining final bahsidan o‘rin olgan “Real Madrid” hamda “Gremio” klublari o‘rtasidagi uchrashuv yakuniga yetdi. Uchrashuvda 1:0 hisobi qayd etilib, yevropaliklar musobaqada ketma-ket ikkinchi marta chempionga aylanishdi.

Uchrashuvning dastlabki bo‘limi 0:0 hisobida yakuniga yetdi. Ikkinchi bo‘limning 53-daqiqasida raqib Krishtianu Ronalduga qarshi qo‘pollik ishlatdi va hakam ushbu vaziyatda jarima zarbasi belgiladi.

Ronaldu esa bu vaziyatdan to‘g‘ri foydalandi va ajoyib zarbasi bilan “Gremio” darvozabonini dog‘da qoldirdi.

Oradan biroz vaqt o‘tib, Ronaldu yana bitta gol urdi, lekin bu vaziyatda hakam Benzemaning offsaydda qolib ketganini ko‘rsatdi va gol inobatga olinmadi.

Uchrashuvda katta ustunlikga ega bo‘lgan madridliklar o‘yin yakuniga qadar bir qancha xavfli vaziyatlarni yaratishdi, lekin o‘yin aynan 1:0 hisobi bilan yakunlandi va shu tariqa “Real” klublar o‘rtasidagi jahon chempionatidagi navbatdagi g‘alabasini rasmiylashtirdi.

Klublar o‘rtasidagi jahon chempionati. Final.

Real Madrid Ispaniya – Gremio Braziliya 1:0.

Gol: 1:0 – 53 Ronaldu.

Real Madrid – Navas, Varan, Marselo, Karvaxal, Ramos, Modrich, Kazemiro, Isko (Vaskes, 73), Kroos, Ronaldu, Benzema (Beyl, 80).

Gremio – Groe, Kannemann, Jeromel, Kortes, Jailson, Ramiro (Everton, 71), Mishel (Maykon, 84), Fernandinyo, Edilson, Luan, Barrios (Jael, 63).

Ogohlantirishlar: Kazemiro (27).