Moskvaning «Lokomotiv» klubi yangi videorolikning yopiq namoyishini o‘tkazdi. Unda «temiryo‘lchilar»ning Rossiyadagi so‘nggi chempionligi qayd etilgan mavsum - 2004 yildan keyin tug‘ilgan ishqibozlar haqida so‘z boradi.
«Bu yil jamoamiz 95 yilligini nishonlamoqda va muhim sanani munosib tarzda nishonlab, auditoriyani kengaytirish haqida o‘yladik, - deydi klub prezidenti Ilya Gerkus. - Mana, hammaning diqqatini tortish uchun birinchi o‘ringa chiqishni uddaladik.
O‘yinlarimizni tomosha qilgani ko‘plab oilalar, yigit va qizlarning tashrif buyurayotgani quvonarli, albatta. O‘z navbatida, bolakaylarga ham e’tibor qaratyapmiz: kichik yoshdanoq klubga ishqibozlik qilish muhim».
Rolikning yopiq namoyishiga «Lokomotiv»ning 7 nafar futbolchisi ham tashrif buyurdi. «Sport-ekspress» nashri fursatdan foydalanib, ushbu o‘yinchilardan biri, O‘zbekiston terma jamoasi himoyachisi Vitaliy Denisovdan intervyu oldi.
«SYOMIN - ASGARD HUKMDORI!»
Denisov kino ixlosmandi sifatida «Adolat ligasi» filmida Supermen rolini ijro etgan aktyor Genri Kevillning mo‘ylovi tufayli yuzaga kelgan tortishuv haqida so‘z yuritdi. Hozircha Vitaliy bu filmni ko‘rganicha yo‘q, ammo boshqa bir superqahramon (o‘zining «egizagi») to‘g‘risidagi yangi blokbasterni o‘tkazib yuborishi mumkin emasdi.
- «Tor» filmini ko‘rgani bordim, albatta. Premyeraga chaqirishmaganidan esa, rosti, ajablandim! - deydi Denisov yuzida tabassum bilan. - «Marvel» studiyasiga tegishli personajlarning (komikslar asosida suratga olingan «O‘rgimchak odam», «Temir odam», «Tor» va shu kabi boshqa kinoasarlar qahramonlari) barini yoqtiraman. «Ragnarek» ham menga juda ma’qul keldi. Ha, Asgardning (film jarayonlari qayd etiladigan to‘qima olam) vayron etilgani achinarli. Yangi qahramonlarning paydo bo‘lgani esa ayni muddao. Komikslar orqali Tor va Lokining singlisi borligini bilardim, ammo uni ekranda ilk bor ko‘rdim. Qolaversa, mutoyibaga boy sahnalar ko‘payibdi - istehzo va pichinglarsiz, faqat quvnoqlik. Ba’zi holatlarda yangi «Tor»dagi yumor o‘rinli ishlatilgan, ayrimlarida esa oshirib yuborilgan. Umuman olganda esa, film juda yaxshi chiqqan. Maslahatim: kinoman va blogerlarning qanday fikr bildirayotganiga e’tibor qaratishmasin. O‘zimga qolsa, bu filmni ikki yoki uch marta qayta ko‘rishga tayyorman.
- Tor o‘zgaribdimi?
- Ha, soch turmagini qisqartiribdi. Rejalarimda undan namuna olish ham yo‘q emas! Sasha Kolomeysev ham bu borada o‘z tavsiyasini berishga ulgurdi: «Sen eski Torligingcha qolibsan, endi sochingni kestirishingga to‘g‘ri keladi!».
- Siz Tor bo‘lsangiz, u holda Yuriy Syominni «Marvel» olamining qaysi personajiga o‘xshatasiz?
- Katta ehtimol bilan u Asgard hukmdori - Odin!
«FARFANDA FUTBOL O‘YNASH ISHTIYOQI KATTA»
- Syominning siri nimada? 70 yoshda bo‘lishiga qaramay, hamon birinchi o‘rinda bormoqda.
- Agar boshqa murabbiylar sirdan voqif bo‘lishganida, undan ibrat olishardi! O‘ylashimcha, hamma gap jamoa bilan to‘g‘ri munosabatni yo‘lga qo‘yishda. Qolaversa, tajriba ham katta rol o‘ynaydi. Syomin bugungi kunda Rossiyadagi eng keksa murabbiylardan biri. Undan faqat Gadjiyev katta bo‘lsa kerak. Shuningdek, u juda his-hayajonga beriluvchan. Joiz topsa, hammaning ta’zirini berishga tayyor turadi. Xabarovskda ham bunga guvoh bo‘lishingiz mumkin edi.
- O‘tkazib yuborilgan gol uchun tanbeh olgandirsiz? DAVOMI
