O‘zbekiston og‘ir atletika federasiyasi Toshkentdagi “Miran” mehmonxonasida yil yakunlariga bag‘ishlangan kecha tashkil etib, unda bir necha nominasiyalar bo‘yicha g‘oliblar nomini e’lon qildi.

Tadbirda joriy yilning 30 noyabr - 6 dekabr kunlari AQSHning Anaxaym shahrida bo‘lib o‘tgan kattalar o‘rtasidagi jahon chempionatining g‘olib va sovrindorlariga davlat tomonidan ajratilgan pul mukofotlari topshirildi.

Avval xabar berib o‘tganimizdek, AQSHda bo‘lib o‘tgan jahon chempionatida O‘zbekiston terma jamoasi o‘z tarixida ilk marotaba musobaqani kuchli uchlikda yakunlagandi.

O‘zbekistonlik sportchilar Doston Yoqubov 69 kg vazn toifasida oltin medalni qo‘lga kiritgan bo‘lsa, 94 kg vazn toifasida Farxodbek Sobirov kumush medal bilan taqdirlangandi.

Shuningdek, Ivan Yefremov 105 kg vaznda bittadan kumush va bronza medallariga ega chiqqandi. Bundan tashqari, Adhamjon Ergashev (62 kg.) delegasiya hisobiga bronza medalini qo‘shib qo‘ygandi.

Taqdirlash marosimida oltin medal sohibi Doston Yoqubovga 12 000, Farxodbek Sobirov va Ivan Yefremovlarga 6 000 va Adhamjon Ergashevga 3 000 AQSH dollari miqdorida mukofot pullariga sertifikatlar topshirildi.

Doston Yoqubov shuningdek, O‘zbekiston og‘ir atletika federasiyasi tomonidan “Yilning eng yaxshi sportchisi” deya e’lon qilindi va diplom hamda esdalik sovg‘asi bilan taqdirlandi.

Dostonning ustozi Farxod Mirzadjanov esa “Yilning eng yaxshi murabbiyi” nominasiyasida g‘olib chiqdi va federasiya rahbariyati tomonidan mukofotlandi.

Federasiyaning rag‘batlantiruvchi mukofotlari ko‘p yillik samarali mehnatlari uchun sport faxriysi, O‘zbekistonda xizmat ko‘rsatgan sport ustozi Erkin Karimov va O‘zbekiston yoshlar terma jamoasi katta murabbiyi Boris Savchenkoga topshirildi.

“Yilning eng yaxshi hududiy federasiyasi” nominasiyasida esa Xorazm viloyati bo‘limi terma jamoasi g‘olib deya topildi.

Eslatib o‘tamiz, Doston Yoqubov 2 dekabr kuni siltab ko‘tarishda 179 kg. og‘irlikni o‘ziga bo‘ysundirib, final bosqichi ishtirokchilari orasida eng yaxshi natijani qayd etgan holda oltin medalga sazovor bo‘lgan edi.

Akmalxon Eshonxonov