Germaniya Bundesligasi 15-turidan o‘rin olgan «Ayntraxt» - «Bavariya» o‘yini arafasida Myunxen klubi darvozaboni Sven Ulrayx yengil jarohatga yo‘liqdi.
Jamoaning birinchi raqamli kiperi Manuel Noyer esa sentyabr oyi oxirida mashg‘ulot jarayonida jiddiy shikastlanib, safdan chiqqandi.
Hali asosiy tarkibda maydonga tushmagan 17 yoshli iqtidor Kristian Fryuxtl ham chetda - u Bundesliga o‘yinlarida ko‘rinish bermay turib, oyog‘ini qayirib oldi va endi yanvargacha davolanadi.
Shundan og‘ir vaziyatda 36 yoshli Tom Shtarke «Bavariya» uchun oxirgi umid vazifasini o‘tadi. Diqqat qiling, u shu yil may oyida futbolchilik faoliyatini yakunlagani va klub akademiyasida ish boshlashini e’lon qilgandi.
Biroq Noyer-ning uzoq muddat maydonga tusholmasligi ma’lum bo‘lgach, «nafaqa»ga chiqqan kiperni har ehtimolga qarshi «zayavka»ga qo‘shib qo‘yishdi.
Mana, 9 dekabr kuni uning «Ayntraxt» maydonidagi uchrashuvda to‘liq vaqt harakatlanishiga to‘g‘ri keldi. Muhimi, «qariya» Shtarke to‘xtab qolgan faoliyatini munosib tarzda qayta jonlantirdi - klub safidagi yubiley - 100-o‘yinida darvozasi daxlsizligini ta’minlab, «Bavariya» g‘alabasi (1:0)ga munosib hissa qo‘shdi.
«SE» shu bahona Myunxen grandining yangi-eski golkiperi tarixini «titkalab», ba’zi qiziqarli ma’lumotlarga duch keldi.
TOM SHTARKE HAQIDA...
Bo‘lajak golkiper 1981 yili sobiq GDRda tug‘ilgan va bolaligida G‘arbiy Germaniyada joylashgan jonajon shaharchasi Fraytalning «Shtali» klubi maktabida shug‘ullangan. Tom keyinchalik futbol tahsilini Drezden «Dinamo»si akademiyasida davom ettiradi.
Uning birinchi professional klubi - bu «Bayer». To‘g‘ri, Shtarke Leverkuzen jamoasida 6 mavsum ushlanib turgan bo‘lsada, asosiy tarkibda biror marta maydonga tushmagan. Xullas, Tom uzoq vaqt «dorishunoslar»ning ikkinchi jamoasi darvozasini qo‘riqlash bilan kifoyalanadi.
Shu joyda bitta qiziqarli fakt: Shtarke katta futboldagi debyutini 23 yoshida xuddi kechagina futbolga majburiy holatda qaytgani kabi taqdir taqozosiga ko‘ra nishonlagandi. Aniqroq aytsak, yosh Tom o‘sha vaqt «Gamburg» ixtiyorida edi va ikki nafar asosiy darvozabon birdaniga safdan chiqqach, klub murabbiylari ilojsizlikdan uchinchi raqamli kiperga ishonch bildirishadi.
O‘xshashlikni qarang, o‘shanda ham Shtarke o‘z darvozasidan gol qo‘yib yubormay, DAVOMI
