9 yanvar kuni Xitoy mamlakatida 23 yoshgacha bo‘lgan futbolchilar o‘rtasida Osiyo chempionati musobaqasi boshlanadi.
Ushbu musobaqa uchinchi marta o‘tkazilmoqda. Dastlabkisi, 2013 yil Ummon davlatida bo‘lib o‘tgan. O‘shanda finalga Iroq va Saudiya Arabistoni terma jamoalari yetib kelishgan. Final uchrashuvi Iroq terma jamoasining 1:0 hisobidagi g‘alabasi bilan yakuniga yetgandi. Uchinchi o‘rin Iordaniya terma jamoasiga nasib etgan.
U-23 Osiyo chempionatining ikkinchisi 2016 yil Qatarda bo‘lib o‘tgan. Bu musobaqada yuqori o‘rinlarni egallagan jamoalarga Rio-2016 Olimpiadasiga yo‘llanma taqdim etilardi. Finalga Yaponiya va Janubiy Koreya terma jamoalari yetib kelishdi. Yaponiyaliklar 3:2 hisobida g‘alaba qozonib, chempionlikka erishishgan. Uchinchi o‘rin Iroq terma jamoasiga nasib etgan.
9 yanvar kuni uchinchi bor o‘tkazilayotgan U-23 Osiyo chempionatiga start beriladi. Musobaqada jami 16ta terma jamoa qatnashadi. O‘tgan yilning 24 oktyabr kuni mazkur musobaqaga qur’a tashlangan bo‘lib, jamoalar quyidagi guruhlardan joy olishgan:
"A" guruhi - Xitoy, Qatar, O‘zbekiston, Ummon
"B" guruhi - Yaponiya, KXDR, Tailand, Falastin
"C" guruhi - Iroq, Iordaniya, Saudiya Arabistoni, Malayziya
"D" guruhi - Janubiy Koreya, Avstraliya, Suriya, Vyetnam
Ravshan Haydarov boshchiligidagi terma jamoamiz 4 yanvar kuni Osiyo chempionatida ishtirok etish uchun Xitoyga uchib ketishadi. Vakillarimiz guruh uchrashuvlarini quyidagi taqvim asosida o‘tkazishadi:
9 yanvar soat 16:30 Qatar - O‘zbekiston
12 yanvar soat 13:00 O‘zbekiston - Xitoy
15 yanvar soat 13:00 Ummon - O‘zbekiston
*O‘yinlar boshlanishi Toshkent vaqti bilan ko‘rsatilgan.
