Ulug‘bek Baqoyev boshqaruvidagi “Buxoro” o‘z tarkibini kuchaytirishda davom etmoqda.
Yaqinda jamoa yig‘iniga mamlakatimizning taniqli futbolchilari - Shavkat Mullajonov bilan Shavkat Salomov kelib qo‘shilgani haqida xabar bergandik. Kuni-kecha ushbu tajribali o‘yinchilar bilan klub o‘rtasida rasmiy kelishuvga erishildi va tomonlar o‘zaro shartnoma imzoladi. Shu tariqa Mullajonov bilan Salomov joriy mavsumni “Buxoro”da o‘tkazadigan bo‘ldi. Umid qilamizki, ushbu futbolchilarning tajribasi chempionat davomida jamoamizga asqotadi.
O‘tgan mavsum jamoamiz safida sermahsullik ko‘rsatib, xatto milliy terma jamoadan ham taklif ola boshlagan hujumchi Ivan Nagayev ayni damda “Buxoro” mashg‘ulotlarid ishtirok etmoqda. Ammo shunisi aniqki, Nagayev yaqin orada jamoa bilan xayrlashib, xorij klubiga ko‘chib o‘tadi. Boisi 28 yoshli hujumchiga Qozog‘iston va arab davlati jamoalaridan jiddiy qiziqish bo‘lmoqda. Uning qaysi jamoaga o‘tishi haqida keyiroq aniq ma’lumot beramiz.
Toshkentdagi yig‘in chog‘ida murabbiylar yana ayrim futbolchilar bilan ham do‘stona ravishda xayrlashishi kutilmoqda. Ularning kimligi sinov-nazorat uchrashuvlaridan so‘ng aniq bo‘ladi. Eslatib o‘tamiz, “Buxoro” 13 yanvar kuni “Mash’al”ga qarshi o‘rtoqlik o‘yinida maydonga tushadi.
“Buxoro” matbuot xizmati.
